ހިންމަފުށީގައި ހަމަނުޖެހުން ހިންގި ފަސް މީހަކު ހައްޔަރުކޮށްފި
ހިންމަފުށީގައި ހުންނަ ގެސްޓު ހައުސްއަކަށް ވަދެ އެ ތަނުގެ ތަކެއްޗަށް ގެއްލުންދިން މީހަކާއި އެ ރަށުގައި ހަމަނުޖެހުން ހިންގި އިތުރު ހަތަރު މީހަކު ހައްޔަރުކޮށްފިއެވެ.
ފުލުހުން ބުނީ ހިންމަފުށީ ގެސްޓުހައުސްއަކަށް ގެއްލުންދިން މައްސަލަ ރިޕޯޓުކުރީ ހުކުރު ދުވަހުގެ ހަވީރު ކަމަށެވެ.
އެ މައްސަލައާ ގުޅިގެން ކޯޓު އަމުރެއްގެ ދަށުން އެ ރޭ ހައްޔަރުކުރީ 32 އަހަރުގެ ފިރިހެނެއްކަމަށް ފުލުހުން ބުންޏެވެ. ނަމަވެސް އޭނާގެ ބަންދާމެދު ގޮތެއް ނިންމަން ކޯޓަށް ހާޒިރުކުރުމުން ވަނީ ޝަރުތުތަކާއެކު ދޫކޮށްލައިފައެވެ.
32 އަހަރުގެ މީހާ ހައްޔަރުކުރުމުން އެ ރޭ މެންދަމު ބަޔަކު ވަނީ ގެސްޓުހައުސް ކައިރީގައި ހަމަނުޖެހުން ހިންގާފައެވެ. އެ މައްސަލައާ ގުޅިގެން 20 އަހަރުގެ މީހަކާއި, 27 އަހަރުގެ މީހަކާއި, 29 އަހަރުގެ މީހަކާއި, 37 އަހަރުގެ މީހެއް ކަމަށް ފުލުހުން ބުންޏެވެ.
އެ ބަންދާމެދު ގޮތެއް ނިންމަން ކޯޓަށް ހާޒިރުކުރުމުން ދެ މީހަކު ވަނީ ދޫކޮށްލައިފައެވެ. އަދި އަނެއް ދެ މީހުންގެ ބަންދަށް ވަނީ 05 ދުވަސް ޖަހައިފައެވެ.
ފުލުހުން އަންނަނީ މި މައްސަލަތައް ތަޙްޤީޤު ކުރަމުންނެވެ.
Ads by STO
