މަޖިލީހުގެ ސާޖަންޓް އެޓް އާމްސްގެ މަޤާމަށް ކުރިމަތިލުމުގެ ފުރުސަތު ހުޅުވާލައިފި
ރައްޔިތުންގެ މަޖިލީހުގެ ސާޖަންޓް އެޓް އާމްސްގެ މަޤާމަށް ކުރިމަތިލުމަށް ފުރުސަތު މިއަދުން ފެށިގެން ހުޅުވާލައިފިއެވެ.
އެ މަޤާމަށް ކުރިމަތލެވޭނީ ޢުމުރުން 25 އަހަރުން ފެށިގެން މަތީގެ މީހުންނަށެވެ. މަޤާމުގެ މުސާރައަކީ 32000 ރުފިޔާއެވެ.
ސާޖަންޓް އެޓް އާމްސްއަކީ މަޖިލީހުގެ އަމީންއާންމުގެ މަޤާމާ ޖެހިގެން ދެވަނައަށް އެންމެ އިސްވެރިޔާއެވެ.
''ރައްޔިތުންގެ މަޖިލީހުގެ ސާޖަންޓް އެޓް އާމްސްގެ މަޤާމަށް ކުރިމަތިލުމަށް އެދޭ ފަރާތްތަކުން، އެ ފަރާތެއްގެ ދިވެހި ރައްޔިތެއްކަން އަންގައިދޭ ކާޑުގެ ކޮޕީއާއި، އެ ފަރާތުގެ ވަނަވަރާއި ތަޢުލީމީ ސެޓްފިކެޓުތަކުގެ ކޮޕީއާއި، ލިބިފައިވާ މަސައްކަތު ތަޖުރިބާގެ މަޢުލޫމާތު (ލިޔުމުން) 28 ސެޕްޓެންބަރު 2022 ވާ ބުދަ ދުވަހުގެ މެންދުރު 12:00 ގެ ކުރިން ރައްޔިތުންގެ މަޖިލީހުގެ އިދާރާއަށް ހުށަހެޅުމަށް ޢާންމުކޮށް އަންގައި އިޢުލާންކުރީމެވެ.'' މަޖިލީހުގެ އިދާރާއިން މިއަދު ކުރި އިއުލާނުގައި ވެއެވެ.
މަޖިލީހުގެ ސާޖެންޓް އެޓް އާމްސް މަޤާމު އުފެއްދީ 2013 ވަނަ އަހަރުއެވެ. އެ މަޤާމު އުފެއްދީއްސުރެ އެ މަޤާމު އަދާކުރައްވަމުން ގެންދެވީ މުޙައްމަދު ޙަލީމެވެ.
މަޖިލީހުން ބަލަމުންދިޔަ މައްސަލައަކާ ގުޅިގެން ޙަލީމް މިދިޔަ އަހަރު ޖެނުއަރީގައި ސަސްޕެންޑް ކުރުމަށްފަހު, މަޤާމުން ވަކިކުރީ މިދިޔަ އޮގަސްޓު 24 ގައެވެ.
