ޙުކުމްކުރުން ލަސްވުމުން މެޖިސްޓްރޭޓެއްގެ މައްސަލަ ބަލަން ނިންމައިފި

ސ.ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް ރަފީޢުއްދީން އަޙްމަދުގެ ސުލޫކީ މައްސަލައެއް ބެލުމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ނިންމައިފިއެވެ.

Ads by MWSC

އެ މައްސަލައަކީ ހިތަދޫ މެޖިސްޓްރޭޓް ކޯޓަށް ހުށަހަޅާފައިވާ ޖިނާޢީ މައްސަލައެއްގައި ޚުލާސާ ބަޔާން އިއްވެވުމަށްފަހު, ޙުކުމް ކުރުމުގެ މަޖިލިސް ބާއްވަންޖެހޭ ކަމަށް ޤާނޫނުގައި ބުނާ 30 ދުވަހުގެ މުއްދަތު ފަހަނައަޅާ ދިޔައިރު ވެސް, މައްސަލައިގެ ޙުކުމް ކުރައްވާފައިނުވާކަމަށް ބުނެ ޖޭއެސްސީއަށް ހުށަހެޅި މައްސަލައެވެ.

ޖޭއެސްސީން މިއަދު ބުނީ މި މައްސަލައާ ގުޅިގެން މެޖިސްޓްރޭޓް ރަފީޢުއްދީން އަޙްމަދުގެ ސުލޫކީ މައްސަލަ ބެލުމަށް ނިންމީ މި މަހުގެ 05 ވީ ބުދަ ދުވަހު ބޭއްވި އެ ކޮމިޝަނުގެ 69 ވަނަ ޖަލްސާގައި ކަމަށެވެ. އަދި މި މައްސަލަ ތަޙްޤީޤުކުރުމަށް ކޮމިޓީއެއް އެކުލަވާލާފައިވާ ކަމަށް ވެސް ޖޭއެސްސީން ބުންޏެވެ.