އަންނަ އަހަރަކީ ރާއްޖޭގެ ފަތުރުވެރިކަމުގެ ރެކޯޑްތައް މުގުރާލާނެ އުއްމީދު ބޮޑު އަހަރެއް: އަމީރު
އަންނަ އަހަރަކީ ރާއްޖޭގެ ފަތުރުވެރިކަމުގެ ރެކޯޑްތައް މުގުރާލާނެ އުއްމީދު ބޮޑު އަހަރެއްކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ފިނޭންސް މިނިސްޓަރ މިހެން ވިދާޅުވީ އަންނަ އަހަރަށް ލަފާކުރާ ދައުލަތުގެ ބަޖެޓް މަޖިލީހަށް ހުށަހަޅުއްވަމުންނެވެ.
މިނިސްޓަރ ވިދާޅުވީ 2023 ވަނަ އަހަރު ރާއްޖެ އަށް 1.8 މިލިއަން ފަތުރުވެރިން ޒިޔާރަތްކުރާނެކަމަށް ބެލެވޭ ކަމަށެވެ. އަދި މިއީ 2019 ވަނަ އަހަރަށް ވުރެ ގިނަ އަދަދަކަށް ޒިޔާރަތްކުރާނެ، ފަތުރުވެރިކަމުގެ ރެކޯޑްތައް މުގުރާލާނެ އުންމީދު ބޮޑު އަހަރެއް ކަމަށް ވިދާޅުވިއެވެ.
“ކުރިއަށް މި އޮތީ ރާއްޖޭގެ ފަތުރުވެރިކަމުގެ ޕީކް ސީޒަނެއް، މި އަހަރުގެ މިހާތަނަށް އެކަނިވެސް ވޭތުވެދިޔަ އަހަރު ޒިޔާރަތްކުރި މިންވަރަށް ވުރެ ގިނައިން ފަތުރުވެރިން ޒިޔާރަތްކޮށްފައިވޭ. އަންނަ އަހަރަކީ ރާއްޖޭގެ ފަތުރުވެރިކަމުގެ ރެކޯޑެއް ހަދާނެ އަހަރަކަށް ވާނެކަމުގެ އުންމީދު ބޮޑު“ އަމީރު ވިދާޅުވިއެވެ.
މިނިސްޓަރ ވިދާޅުވީ ފަތުރުވެރިކަމާ ގުޅިފައިވާ ދަތުރުފަތުރުގެ ނިޒާމާއި މިއާސަލޫތުގެ ދާއިރާވެސް އަންނަ އަހަރު ކުރިއަރާނެ ކަމަށެވެ. މީގެ އިތުރުން ރާއްޖޭގެ ހޯލްސޭލް އަދި ރީޓޭލް ވެސް ކުރިއަރާނެ ކަމަށް ވިދާޅުވިއެވެ.
މީގެ އިތުރުން ފަތުރުވެރިކަން މުޅި ރާއްޖެއަށް ފުޅާކުރުމަށް، ރާއްޖޭގެ ކަންކޮޅުތަކުގައި އެއާޕޯޓްތައް ތަރައްގީކޮށް ކެޕޭސިޓީ އިތުރުކުރުމުގެ މަސައްކަތްތައް ކުރިއަށްދާކަމަށް މިނިސްޓަރ ވިދާޅުވިއެވެ.
