މަޖިލިސް ހިނގާ ގޮތް ކަމުނުދާތީ މެމްބަރުން ރައީސްގެ އަރިހަށް!
ރައީސް އިބްރާހިމް މުހައްމަދު ޞާލިހުއާ ބައްދަލުކުރެއްވުމަށް ރައްޔިތުންގެ މަޖިލީހުގެ ގިނަ އަދަދެއްގެ މެންބަރުން މުލިއާގެއަށް ވަޑައިގަންނަވައިފިއެވެ.
"ދެން"އަށް މަޢުލޫމާތު ލިބިފައިވާ ގޮތުގައި މެމްބަރުން ރައީސް އާއި ބައްދަލުކުރެއްވުމަށް ވަޑައިގަންނަވާފައި ވަނީ މަޖިލިސްސް ހިނގާ ގޮތާއި މެދު ހިތްހަމަޖެހިވަޑައިނުގެންނެވެ.
ރައީސް ނަޝީދާމެދު ހިތްހަމަޖެހިވަޑައިނުގެން މެމްބަރުން ރައީސްގެ އަރިހަށް ވަޑައިގެންނެވިއިރު، މަޖިލީހުގެ މިއަދުގެ ޖަލްސާގައި، ޓެކްސް ނެގުމުގެ ޤާނޫނަށް އިޞްލާޙު ގެނައުމުގެ ބިލަށް ވޯޓަށް އަހާފައެއް ނުވެއެވެ. މިކަމާ ގުޅިގެން މެމްބަރުން ނުރުހުންވެސް ފާޅުކުރެއްވިއެވެ.
މިއަދުގެ ވޯޓު ގަޑީގައި މިޖިލީހުގެ ރިޔާސަތުގައި އިންނެވީ ރައީސް ނަޝީދެވެ. ވޯޓުގެ ވަގުތު ޖެހުމުން، ވޯޓަށް އެހީ ޗާގޯސް މައްސަލާގައި ސަރުކާރުގެ ސިޔާސަތު ބަދަލުވެފައިވޭތޯ ބެލުމަށް ދަނގެތީ ދާއިރާގެ މެމްބަރު މުޙައްމަދު ނާޒިމް ހުށަހެޅުއްވި ޤަރާރު ބަލައިގަންނަނަން ފެނޭތޯ ބެލުމަށެވެ. އެޤަރާރު ބަލައިގަތުމަށް ނުފެންނަކަމަށް ފާސްވުމާއެކު ނަތީޖާ ވިދާޅުވުމަށްފަހު ނަޝީދު ވަނީ ޖަލްސާ ނިންމަވާލައްވާފައެވެ. ޓެކްސްގެ ބިލަށް ވޯޓަށް ނޭހީ ކީއްވެގެންކަމެއް ރިޔާސަތުން ވިދާޅެއްނުވެއެވެ.
އިއްޔެވެސް ޓެކްސް ބިލަށް ވޯޓަށް ނާއްސަވައި، ޖަލްސާ ނިންމަވައިލެއްވުމުން، ނިޒާމީ ނުކުތާއެއް ނަންގަވައި، އެކަން ފާހަގަކުރައްވައި، މިއަދުގެ ޖަލްސާގައި، ދިއްގަރު ދާއިރާގެ މެމްބަރު އިކްރާމް ހަސަން ވިދާޅުވީ، އިއްޔެ ޖަލްސާ ނިންމަވައިލެއްވީ ބެލްވެސް ނުޖައްސަވާ ކަމުގައެވެ.
އިކްރާމް މިހެން ވިދާޅުވުމުން، ރައީސް ނަޝީދު ވަނީ އިއްޔެ ހިނގި ކަމަކަށް މިއަދު ނިޒާމީ މައްސަލައެއް ނުނެންގެވޭނެ ކަމަށް ވިދާޅުވެފައެވެ.
މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވީ މަޖިލިސް ނިންމާލާފައިވަނީ ޤާނޫނީ އިމުން ބޭރުން ހުދުމުހުތާރު ގޮތަކަށް ކަމަށާއި، މިއީ ސަރުކާރަށް ޖެއްސުން ކުރުމަށް ކުރަމުންދާ މަސައްކަތުގެ ތެރެއިން ބޮޅެއް ކަމަށެވެ.
މިއަދުގެ ޖަލްސާގައި އެމްޑީޕީގެ ދެ ފެކްޝަނުގެ ކޯޅުން ހޫނުވެ، ދުވާފަރު ދާއިރާގެ މެމްބަރު އިސްމާއިލް އަހުމަދު ވަނީ ރައީސް ނަޝީދަށް ދެން މި ރާއްޖޭގެ ވެރިކަން ދެން ނުލިބޭނެ ކަމަށްވެސް ވިދާޅުވެފައެވެ.
Ads by STO
