އޮލިމްޕަސް ތަރައްޤީކޮށް ހުޅުވުން ލަސްވާ ސަބަބު ހާމަ ކުރައްވައިފި
އޮލިމްޕަސް ތަރައްޤީކޮށް ހުޅުވުން ލަސްވާ ސަބަބު ހެރިޓޭޖް މިނިސްޓަރު ޔުމްނާ މައުމޫން މިއަދު ހާމަކުރައްވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މަކުނުދޫ ދާއިރާގެ މެމްބަރު މުޙައްމަދު ރާއީ ވަނީ، އޮލިމްޕަސް ތަރައްޤީ ކުރުމަށްފަހު، ހުޅުވާނެ ކަމަށް ބުނެ ގިނަ ތާރީޚުތަކެއް ދީފައިވެސް، އެކަން ނުކުރެވި ލަސްވަނީ ކީއްވެގެންތޯއާއި އެކަން ލަސްވެގެން ދިޔުމުގައި، ފިލްމީ މަސައްކަތްތަކަށް ނަފްރަތު ކުރާ އެއްވެސް ބައެއްގެ ނުފޫޒެއް އޮތީތޯ، ޔުމްނާއާ ސުވާލު ކުރައްވައިފައެވެ.
ރާއީގެ ސުވާލަށް ދެއްވި ޖަވާބުގައި މިނިސްޓަރު ޔުމްނާ ވިދާޅުވީ އޮލިމްޕަސް ޒަމާނީ ފެންވަރަށް ތަރައްޤީ ކުރުމުގެ މަޝްރޫޢު ލަސްތަކެއް ވެފައިވާކަން އެކަމަނާވެސް ޤަބޫލު ކުރައްވާ ކަމަށެވެ.
ނަމަވެސް އެކަން ލަސްވީ އެތަން ތަަރައްޤީ ކުރަން ބޭނުންވާ ސާމާނު ގެނައުމަށް ހަވާލު ކުރި ފަރާތުން، މުއްދަތަކަށް ފަހުގައި އެކަން ނުކުރެވޭނެކަން އެންގުމުން، އަލުން އެކަން ކުރާނެ ބަޔަކު ހޯދަން ޖެހުމުން ކަމަށެވެ.
އޮލިމްޕަހަށް ބޭނުންވާ ޒަމާނީ ފެންވަރުގެ ވަސީލަތްތައް ގެނައުމުގަ ލަސްތަކެއް ދިމާވީމި، އެހެންނަމަވެސް، މިހާރު އޭގެ ގިނަ ސާމާނު ވަނީ ގެނެވިފައި ކަމަށް މިނިސްޓަރު ވިދާޅުވިއެވެ.
"އޮލިމްޕަސް ޒަމާނީ ފެންވަރަށް ތަރައްޤީ ކުރުމުގެ މަޝްރޫޢު ނިމޭއިރު، އެތަނުގައި ފިލްމު ސްކްރީން ކުރުމަށް ޑިޖިޓަލް ސިނެމާ ޕްރޮޖެކްޓަރ 7.1 އަދި ސަރައުންޑް ސައުންޑް އަދި ރިޓްރެކްޓް ކުރެވޭ ސިނަމާ ސްކްރީންއެއް ހުންނާނެ. އޮލިމްޕަސް ހޯލްގަ މިއުޒިކް، އަދި ސްޓޭޖް ޑްރާމާ ފަދަ ޝޯތައް ބޭއްވުމަށް ބޭނުންވާ ސްޓޭޖް ލައިޓްތަކާ ސައުންޑް ހޯދާ ތައްޔާރު ކުރެވިފައި ހުންނާނެ."
މިނިސްޓަރު އިތުރަށް ވިދާޅުވީ އޮލިމްޕަސް ތަރައްޤީ ވެގެން އަންނައިރު، އެތަނުގައި މިއުޒިކް ޕްރެކްޓިސް ކުރުމަށް ދެ ކޮޓަރި، ސައުންޑް ސިސްޓަމާއިއެކުގައި، ޤާއިމު ކުރެވިފައި ހުންނާނެ ކަމަށެވެ.
އޮލިމްޕަސް މަޝްރޫޢު ލަސްވާ ސަބަބު ޔުމްނާ ހާމަކުރެއްވިއިރު، ފިލްމީ ދާއިރާގައި އެންމެ ކާމިޔާބު އެއް އެކްޓަރު އަލީ ސީޒަން ދާދި ފަހުން ވަނީ، އޮލިމްޕަސް ނުހުޅުވައި ލަސްވާތީ ސަރުކާރަށް ވަރަށް ބޮޑަށް ފާޑު ކިޔައިފައެވެ. ސީޒަން ބުނީ، އެތަންް ޒަމާނީ ފެންވަރަށް ތަރައްޤީ ކުރާނެ ކަމަށް ބުނިއިރު، މިހާރުވެސް އޮތީ "ގޮނޑެއްހެން" ކަމަށެވެ.
Ads by STO
