ޓެކްސް ބިލާއި ދެކޮޅަށް އެމްޑީޕީގެ 14 މެންބަރުން، އެއްކޮޅަށް ޕީޕީއެމްގެ ހުސެއިން
އިދިކޮޅު ޕީޕީއެމްގެ ފަރެސްމާތޮޑާ ދާއިރާގެ މަޖިލިސް މެންބަރު ހުސެއިން މުހައްމަދު ލަތީފް އިދިކޮޅު ކޯލިޝަންގެ ވިޕްލައިނާ ޚިލާފަށް، ޓެކްސް ބިލާ އެއްކޮޅަށް މިއަދު ވޯޓު ދެއްވައިފިއެވެ. މި ބިލާ ދެކޮޅަށް، އެމްޑީޕީގެ ޕާލަމެންޓްރީ ގްރޫޕުގެ 14 މެމްބަރަކު ވެސް ވޯޓް ދެއްވިއެވެ.
މިއަދު ފާސްކުރި ޓެކްސް ބިލަކީ މުދަލާއި ޚިދުމަތުގެ އަގުން ޓެކްސް ނެގުމުގެ ގާނޫނަށް ސަރުކާރުގެ ފަރާތުން ރައްޔިތުންގެ މަޖިލީހުގެ އިހަވަންދޫ ދާއިރާގެ އެމްޑީޕީ މެންބަރު މުހައްމަދު ޝިފާއު ހުށަހެޅުއްވި އިސްލާހެކެވެ.
އެއީ އަންނަ ޖެނުއަރީ މަހުން ފެށިގެން ޖީއެސްޓީއާއި ޓީޖީއެސްޓީ ބޮޑުކުރުމަށް ހުށަހެޅި އިސްލާޙެކެވެ. މިގެނައި އިސްލާހުގައި ވާގޮތުން ޓީޖީއެސްޓީ %12އިން %16އަށް، އަދި ޖީއެސްޓީ %6އިން %8އަށް ބޮޑު ވެގެން ދާނެއެވެ.
މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް އިސްލާހު ގެނައުމުގެ ބިލު ރައްޔިތުންގެ މަޖިލީހުން މިއަދު ފާސްކޮށްފައިވާއިރު އެ އިސްލާހު ފާސްކުރުމަށް ފެންނަ ކަމަށް 55 މެމްބަރުން ވޯޓު ދީފައިވެއެވެ. އަދި ފާސްކުރުމަށް ނުފެންނަ ކަމަށް 26 މެމްބަރުން ވޯޓު ދީފައިވެއެވެ.
މި މައްސަލައިގައި އިދިކޮޅު ޕީޕީއެމް ޕީއެންސީގެ މެމްބަރުން ވޯޓު ދީފައިވަނީ ޓެކްސް ބޮޑުކުރުމާ ދެކޮޅަށެވެ. މިއަދު ބިލް ފާސް ކުރުމަށް އިދިކޮޅު މެމްބަރު ހުސެއިން މުހައްމަދު ލަތީފް ވޯޓު ދެއްވާފައިވާއިރު، އޭނާ ފިޔަވާ ޕީޕީއެމް ޕީއެންސީގެ ޕާލަމެޓްރީ ގްރޫޕުގެ ތެރެއިން މިއަދު ބިލަށް ދެން ވޯޓު ދެއްވާފައި ނުވަނީ އޭދަފުށީ ދާއިރާގެ މެމްބަރު ސަލީމްއެވެ. އެއީ ޖަލްސާއަށް ހާޒިރުވެ ވަޑައިގެންފައިނުވާތީއެވެ.
އޭގެ އިތުރުން ޖުމުހޫރީ ޕާޓީއަށް ނިސްބަތްވާ 3 މެމްބަރުންގެ ތެރެއިން އިސްދޫ ދާއިރާގެ މެމްބަރު އަލީ ހަމީދު ބިލާ އެއްކޮޅަށް ވޯޓު ދެއްވި އިރު ކެންދޫ ދާއިރާގެ މެމްބަރު އަލީ ހުސެއިން ވޯޓު ދެއްވާފައިވަނީ ބިލް ފާސް ނުކުރުމަށެވެ. ޖުމުހޫރީ ޕާޓީގެ ލީޑަރު ގާސިމް އިބްރާހިމް މިއަދު މަޖިލީހަށް ވަޑައެއް ނުގަންނަވައެވެ.
ބިލު ފާސްކުރުމާއި ދެކޮޅަށް ވޯޓް ދެއްވި އެމްޑީޕީ މެންބަރުންނަކީ؛ ހެންވޭރު އުތުރު ދާއިރާގެ މެމްބަރު އިބްރާހީމް މުއިއްޒު، މެދު ހެންވޭރު ދާއިރާގެ މެމްބަރު އަލީ އާޒިމް، ހެންވޭރު ހުޅަނގު ދާއިރާގެ މެމްބަރު ހަސަން ލަތީފު، ގަލޮޅު ދެކުނު ދާއިރާގެ މެމްބަރު އަދި މަޖޮިލީހުގެ ނައިބުރައީސް އީވާ އަބްދުﷲ، މައްޗަންގޮޅި އުތުރު ދާއިރާގެ މެމްބަރު މުހައްމަދު ރަޝީދު، މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ، މާފަންނު މެދު ދާއިރާގެ މެމްބަރު އިބްރާހީމް ރަޝީދު، އުނގޫފާރު ދާއިރާގެ މެމްބަރު މުހައްމަދު ވަހީދު، ތޮއްޑޫ ދާއިރާގެ މެމްބަރު ހަސަން ޝިޔާން، ވިލުފުށި ދާއިރާގެ މެމްބަރު ހަސަން އަފީފު، މަޑަވެލި ދާއިރާގެ މެމްބަރު ހުސައިން ފިރުޝާން، ގައްދޫ ދާއިރާގެ މެމްބަރު އަހުމަދު ޒާހިރު، ހުޅުދޫ ދާއިރާގެ މެމްބަރު އިލްޔާސް ލަބީބު، ހިތަދޫ މެދު ދާއިރާގެ މެމްބަރު އަހުމަދު ރަޝީދުއެވެ.
