ޕްރައިމަރީއަށް އިތުރު ފަރާތަކުން ކުރިމަތި ނުލުމުން، އެމްއެންޕީގެ ރިޔާސީ ޓިކެޓް ނާޒިމަށް
އެމްއެންޕީގެ ރިޔާސީ ޕްރައިމަރީގައި ބައިވެރިވުމަށް ހުޅުވާލި ފުރުސަތުގައި އިތުރު އެއްވެސް ފަރާތަކުން ކުރިމަތިލާފައި ނުވާތީ، އެޕާޓިގެ 2023ގެ ރިޔާސީ ޓިކެޓް، ޕާޓީގެ ރައީސް އަދި ދަނގެތި ދާއިރާގެ މެންބަރު މުޙައްމަދު ނާޒިމަށް ކަށަވަރު ވެއްޖެއެވެ.
އެމްއެންޕީގެ ތަރުޖަމާނު، ޝިދާތާ ޝަރީފު ވިދާޅުވީ މެންދުރު 2:00 ގައި މުއްދަތު ހަމަވިއިރު ކުރިމަތިލެއްވީ ޕާޓީގެ ވަގުތީ ރައީސްކަމުގައި ހުންނެވި މެމްބަރު ނާޒިމް އެކަނި ކަމަށެވެ.
އެމްއެންޕީގެ ރިޔާސީ ޕްރައިމަރީގައި ވާދަކުރަން ފޯމް ހުށައެޅުއްވުމަށްފަހު ނާޒިމް ވިދާޅުވީ، އެމްއެންޕީ އަކީ ރައްޔިތުންނަށް އޮތް އާ އުންމީދެއްކަމަށާއި، އާ ފުރިހަމަ ވިސްނުމެއްކަމަށެވެ.
ރިޔާސީ އިންތިހާބަށް މިހާތަނަށް ޝައުގުވެރިކަން ފާޅުކުރި ޕާޓީތަކުގެ ތެރޭގައި ވެރިކަން ކުރާ މައި ޕާޓީ އެމްޑީޕީ، އިދިކޮޅު ޕީޕީއެމް، އަދި އެމްޑީއޭ ހިމެނެއެވެ.
ޕީޕީއެމްގެ ރިޔާސީ ކެންޑިޑޭޓަކީ ކުރީގެ ރައީސް އަބްދުﷲ ޔާމީނެވެ. އެމްޑީއޭއިން ވާދަކުރައްވަނީ އެ ޕާޓީގެ ލީޑަރު އަހުމަދު ސިޔާމް މުހައްމަދެވެ. އެމްޑީޕީގެ ކެންޑިޑޭޓް ކަނޑައަޅަނީ ޕްރައިމަރީއަކަށް ފަހުގައެވެ.
މި ޤައުމުގައި ފައިސާކޮޅެއް ލިބޭއިރަށް ދެން އެމީހަކު ފައި މިނަގަނީ ޤައުމުގެ ރައީސުކަމަށް ! ރައީސު ކަމަކީ އެމީހެއްގެ ގައިގާ އެކަން ކުރުމުގެ ވަރަށްގިނަ ސިފަހުރެގެން ކުރެވޭނެ ކަމެއް، ނަފުސާނީ ޖިސްމާނީ ދުޅަހެޔު ކަމާއި ޢިލްމާއި ހުނަރާއި ޤާބިލްކަން ރިވެތި އަހުލާޤު، މީހުން ލޯބިކުރާ މީހަކަށް ވުން މީހުންދެކެ ލޯބިވާ ސިފަ ހުންނަމީހަކަށް ވުން !