ސައުދީ އަރަބިއްޔާ އިން ވެސް ކޮރޯނާ ވައިރަސް ފެނިއްޖެ
ހަލުވިކަމާއެކު ދުނިޔޭގެ އެކި ކަންކޮޅުތަކުގައި ފެތުރެމުން އަންނަ ނޮވެލް ކޮރޯނާ ވައިރަސް ސައުދީ އަރަބިއްޔާ އިން ފެނިއްޖެ އެވެ.
ސައުދީގެ ހެލްތު މިނިސްޓްރީން ބުނީ ވައިރަސް ފެނިފައިވަނީ އިރާނަށް ދަތުރުކޮށްފައި، ބަހްރެއިންގެ މަގުން ސައުދީ އަށް އެނބުރި އައި އެގައުމުގެ ފިރިހެނެއްގެ ގައިން ކަމަށެވެ. ސައުދީ އަށް އެތެރެވުމުގެ ކުރިން އިރާނަށް ދަތުރުކޮށްފައިވާކަން އޭނާ ބުނެފައި ނުވާ ކަމަށްވެސް މިނިސްޓްރީން ބުނެއެވެ.
ކޮރޯނާ ވައިރަސް އިރާނުގައި ވަރަށް ބޮޑަށް ވަނީ ފެތުރިފައެވެ. އެގޮތުން މިހާތަނަށް މި ބައްޔަށް އިރާނުން 978 މީހުން ޕޮޒިޓިވް ވެފައިވާއިރު، މި ބަލީގައި 54 މީހަކު ވަނީ އެގައުމުން މަރުވެފައެވެ. އިރާނަކީ ޗައިނާ ފިޔަވައި މި ބަލީގައި ދެން އެންމެ ގިނަ މީހުން މަރުވި ގައުމެވެ.
އިރާނުގައި މި ބަލި ފެތުރިފައިވާތީ އެގައުމަށް ދަތުރުނުކުރަން އަވަށްޓެރި ގައުމުތަކުން އަންނަނީ އިލްތިމާސްކުރަމުންނެވެ. އަދި އިރާނުގައި ތިބި އެހެން ގައުމުތަކުގެ މީހުން އަނބުރާ ގައުމަށް ގެނައުމުގެ މަސައްކަތް ވެސް މިހާރު އަންނަނީ ކުރަމުންނެވެ.
ކޮރޯނާ ވައިރަހުގައި މިހާތަނަށް 3،000 އަށް ވުރެ ގިނަ މީހުން މަރުވެފައިވާއިރު، މި ބަލި ގާތްގަނޑަކަށް 80،000 އަށް ވުރެ ގިނަ މީހުންނަށް ވަނީ ޖެހިފައެވެ.
Ads by STO
