ތުރުކީ-ސީރިއާ ބޯޑަރު ސަރަހައްދަށް އަނެއްކާވެސް ބާރު ގަދަ ބިންހެލުމެއް
ތުރުކީއާ ސީރިއާއަށް އަނެއްކާވެސް ބާރު ގަދަ ބިންހެލުމެއް އަތުވެއްޖެއެވެ.
ތުރުކީ-ސީރިއާ ބޯޑަރު ސަރަހައްދަށް 6.4 މެގްނިޓިއުޑްގެ ބާރުގަދަ ބިންހެލުމެއް އައިސްފައި މިވަނީ މި މަހުގެ ކުރީކޮޅު އައި ބިންހެލުމުގައި އެތައް ހާސް ބަޔަކު މަރުވެފައި ވަނިކޮށެވެ.
މިރޭ 8:04 ހާއިރު ޑެފްނޭ އަވަށަށް އައި ބިންހެލުމުގެ އަސަރު އުތުރުން 200 ކިލޯމީޓަރު (300 މޭލު) ދުރުގައި އޮންނަ އަންތަކްޔާ އާއި އަދާނާ ސިޓީއަށް ވަރަށް ބޮޑަށް އިހުސާސް ކުރެވުނު ކަމަށް މީޑިއާތަކުން ރިޕޯޓް ކުރެއެވެ.
ތުރުކީގެ އިމަޖެންސީ މެނޭޖްމަންޓް އެޖެންސީން ބުނީ، މިރޭގެ ބިންހެލުން އައިތާ ކުޑަ އިރުކޮޅެއް ފަހުން، ހަޓޭގެ ސަމަންދާގް ޑިސްޓްރިކްޓަށް 5.8 މެގްނިޓިއުޑްގެ ދެވަނަ ލޮޅުމެއް އަރާފައިވާ ކަމަށެވެ.
މި ހާދިސާގައި އެއްވެސް މީހަކަށް ގެއްލުމެއް ލިބުނު ކަމުގެ މައުލޫމާތެއް އަދި ލިބިފައެއް ނުވެއެވެ.
ތުރުކީގެ ރަސްމީ ނޫސް އެޖެންސީ އަނަޑޯލޫއިން ބުނީ ބިންހެލުންތައް އިހުސާސް ކުރެވިފައި ވަނީ، ސީރިއާ، އުރުދުން، އިސްރާއީލް އަދި މިސްރަށް ކަމަށެވެ.
އަލްޖަޒީރާގެ ނޫސްވެރިޔަކު ގަޒިއަންޓެޕްއިން ރިޕޯޓްކުރަމުން ބުނީ، އެ ސަރަހައްދުގައި އިތުރު އިމާރާތްތަކެއް ހަލާކުވެފައިވާކަމުގެ މައުލޫމާތު ލިބިފައިވާ ކަމަށެވެ. އަދި މިހާރުވެސް ގިނަ "އާފްޓަރޝޮކް" ތަކެއް އަންނަމުންދާ ކަމަށް އެ ނޫހުގައި ރިޕޯޓް ކޮށްފައިވެއެވެ.
މި ބިންހެލުމާ ގުޅިގެން ތުރުކީގެ އެލާޒިގްގެ ޖިއޮލޮޖީ އެސިސްޓެންޓް ޕްރޮފެސަރު، މެހްމެޓް ކޮކުމް ވިދާޅުވީ ފެބްރުއަރީ މަހުގެ ހަވަނަ ދުވަހުން ފެށިގެން މިހައިތަނަށް 5،000 އަށް ވުރެ ގިނަ "އާފްޓާޝޮކް" އައިސްފައިވާ ކަމަށެވެ.
"މިއީ ވެދާނެ ކަމަށް ލަފާ ކުރެވުނު ކަމެއް. އަޅުގަނޑުމެންނަށް ތަޖުރިބާއިން އެނގޭ، އާފްޓަރޝޮކްތައް މަހަކުން އަހަރަށް ދެމިގެންދާނެކަން. އެކަމަކު ދުވަހެއް ދުވަހަކަށް މަދުވާނެ،" އަލްޖަޒީރާއަށް ދިން އިންޓަވިއުއެއްގައި އޭނާ ވިދާޅުވިއެވެ.
Ads by STO
