ރައީީސް ނަޝީދު ޤާސިމްގެ އެޑްވައިޒަރާ ބައްދަލުކުރައްވައިފި
ރައްޔިތުންގެ މަޖިލިހުގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު, ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ އެޑްވައިޒަރު އިލްހާމް އަޙްމަދާ ބައްދަލު ކުރައްވައިފިއެވެ.
ރައްޔިތުންގެ މަޖިލިހުގެ އިދާރާގައި ބޭއްވި އެ ބައްދަލުވުމުގައި ރައީސް ނަޝީދުގެ އަރިހުގައި އެމްޑީޕީގެ ނައިބު ރައީސް މުޙައްމަދު ޝިފާޒާއި އެ ޕާޓީގެ ކުރީގެ ޗެއާޕާސަން، އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފާއި ހުޅުދޫ ދާއިރާގެ މެމްބަރު އިލްޔާސް ލަބީބު ބައިވެރިވެވަޑައިގެންނެވިއެވެ.
އެ ބައްދަލުވުމާ ގުޅޭ ތަފުސީލެއް އެއްވެސް ފަރާތަކުން ހާމައެއް ނުކުރައްވައެވެ.
މިދިޔަ އާދިއްތަ ދުވަހުގެރޭ ނިމުނު ޖުމްހޫރީ ޕާޓީގެ ހަތަރު ވަނަ ކޮންފަރެންސްގައި ވަނީީ އެ ޕާޓީ އިސްވެ އޮވެ، ކޯލިޝަނެއް ހެދުން ނުވަތަ ޕާޓީގެ ކެންޑިޑޭޓަކު ރިޔާސީ އިންތިޚާށް ނެރެން ގޮވާލައި ކައުންސިލަށް ލަފާ އެރުވުމަށް ޤަރާރެއް ފާސްކޮށްފައެވެ.
މި ރަސްމިއްޔާތުގައި ޖޭޕީގެ ލީޑަރު، ޤާސިމް ވަނީ ރައީސް ނަޝީދަށް ވަރަށް ބޮޑަށް ތަޢުރީފު ކުރައްވައި ވާހަކަ ވެސް ދައްކަވައިފައެވެ.
ރައީސް ނަޝީދުގެ ސިޔާސީ ފިކުރަށް ތަރުހީބު ދޭ "ހަސަން ކުރުސީ"ގެ ޓްވިޓަރ އެކައުންޓުން ދަނީ ޤާސިމް، މި އަހަރުގެ ރިޔާސީ ރޭހަށް ނުކުންނަން ތާއީދުކޮށް، ޓްވީޓު ކުރަމުންނެވެ.
