31 މިލިއަން ރުފިޔާ ދެއްވީ ޤަވާއިދާ އެއްގޮތަށްތޯ ތަކުރާރުކޮށް އެއްސެވުމުންވެސް އަމީރު ޖަވާބެއް ނުދެއްވި
ކޮވިޑް-19 އާ ގުޅިގެން ވެންޓިލޭޓަރު ގަތުމަށް ދުބާއީގެ އެގްޒެކިއުޓާސް ޖެނަރަލް ޓްރޭޑިންއަށް ދިވެހި ސަރުކާރުން 31 މިލިއަން ރުފިޔާ ދޫކޮށްފައިވަނީ މާލިއްޔަތު ޤާނޫނާއި ޤަވާއިދާ އެއްގޮތްވާ ގޮތަށްތޯ ތަކުރާރުކޮށް ސުވާލު ކުރެއްވުމުން ވެސް ފައިނޭންސް މިނިސްޓަރު އިބްރާހިމް އަމީރު އެ ސުވާލަށް ޖަވާބެއް ނުދެއްވިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ކުޑަހުވަދޫ ދާއިރާގެ މެންބަރު އަޙުމަދު އާމިރު ވަނީ 31 މިލިއަން ރުފިޔާ ދޫކޮށްފައިވަނީ މާލިއްޔަތު ޤާނޫނާއި ޤަވާއިދާ އެއްގޮތްވާ ގޮތުގެ މަތިންތޯއާއި މި ފައިސާ ހޯދުމަށް އާބިޓްރޭޝަނަށް ގިނަ ދުވަސް ނެގީ ކީއްވެތޯ ސާފުކުރެއްވުމަށް މިނިސްޓަރު އަމީރާއި ސުވާލުކުރައްވައިފައެވެ.
އެހެންނަމަވެސް އެ މައްސަލަ އާބިޓްރޭޝަންގައި އޮތުމުން އެކަމާ ގުޅޭ ގޮތުން ދެއްވާ ޖަވާބަކުން މައްސަލައަށް އަސަރުކޮށްފާނެ ކަމަށް ވިދާޅުވެ މިނިސްޓަރު އަމީރު ވަނީ އާމިރުގެ ސުވާލަށް ޖަވާބު ދެއްވުމަށް އިންކާރުކުރައްވައިފައެވެ.
އެއާއެކު މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވަނީ އާބިޓްރޭޝަންގައި މައްސަލައެއް އޮތުމުން ރައްޔިތުންގެ މަޖިލީހުން ކުރެވޭ ސުވާލަކަށް ޖަވާބު ދެވެން ނެތްކަމަށް ވިދާޅުވުމަކީ އުސޫލީ ކަމެއް ކަމަށް ވިދާޅުވެފައެވެ. މިސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ ދައުލަތުގެ އެއްވެސް ވުޒާރާއަކުން އޮޑިޓަރ ޖެނެރަލްގެ އޮފީހުންވެސް އަދި އެންޓި ކޮރަޕްޝަން ކޮމިޝަނުން ވެސް ނެރެފަ އޮތް ރިޕޯޓްތަކުން ވެސް މިނިސްޓްރީ އޮފް ފިނޭންސުން އަދި މިނިސްޓަރ ވެސް، މާލިއްޔަތު ގާނޫނާއި ޚިލާފަށް ކަމެއް ކޮށްފައި އޮތްކަމަށް ނެތްކަމަށެވެ.
އޭގެ ފަހުން އަނެއްކާވެސް މެމްބަރު އާމިރު ވަނީ މި ސުވާލު ތަކުރާރު ކުރައްވައިފައެވެ. އެހެންނަމަވެސް އެ ފަހަރުވެސް މިނިސްޓަރު ވަނީ އެސުވާލަށް ޖަވާބު ދެއްވަން ދެކޮޅު ހައްދަވައިފައެވެ.
"އަޅުގަނޑު އެ ސުވާލަށް އެގޮތަށް ޖަވާބު ދެއްވާނީ އެޓާނީ ޖެނެރަލް އޮފީހުގެވެސް ލަފައާ އެއްގޮތަށް،" އަމީރު ވިދާޅުވިއެވެ.
މިނިސްޓަރު އިތުރަށް ވިދާޅުވީ މިހައިތަނަށް ބެލިބެލުމުން އެ މައްސަލަގައި ފިނޭންސް މިނިސްޓްރީ އުސޫލުތަކާއި ހިލާފަށް އެއްވެސް ކަމެއް ކޮށްފައި ނުވާކަން ފާހަގަ ކުރެވިފައިވާ ކަމަށެވެ. އަދި އެ މައްސަލައާ ގުޅިގެން ޕްރޮކިއުމަޓް އިތުރަށް ހަރުދަނާކުުރުމަށް އޭސީސީން އެންގި ކަންކަން ކޮށްފައިވާ ކަމަށް ވެސް އަމީރު ވިދާޅުވި މއެވެ.
Ads by STO
