ރަށްރަށް ތަފާތު ނުކުރިއަސް މީހުންގެ މެދުގައި ތަފާތު އެބަކުރޭ: އިބުރާ
މިސަރުކާރުން ތަފާތުކުރުމެއް ނެތި ރަށްރަށުގައި ޕްރޮޖެކްޓްތައް ހިންގި ނަމަވެސް ވަކި ވަކި މީހުންގެ މެދުގައި ތަފާތުކުރާކަމަށް އިބްރާހިމް އިސްމާއިލް (އިބުރާ) ވިދާޅުވެއްްޖެއެވެ.
އިބުރާ ވިދާޅުވީ ރާއްޖޭގައި 100000 މީހުންގެ އާބާދީއެއް އޮންނަ ރަށެއްގައި ބަނޑުހައި ހޫނުކަމުގައި މީހުން އެބަތިބިކަމަށެވެ.
"ތަފާތު ކުރުމެއްނެތިއޭ ބުނެ 100 މީހުން އުޅޭ ރަށެއްގައި 300 މީޓަރުގެ ބަނދަރެއް އަޅަން ދަރަނިވެރިވާއިރު، 100000 މީހުންގެ އާބާދީއެއް އޮންނަ ރަށެއްގައި ބަނޑުހައި ހޫނުކަމުގައި މީހުން އެބަތިއްބެވެ. ރަށްރަށް ތަފާތު ނުކުރިއަސް މީހުންގެ މެދުގައި ތަފާތު އެބަކުރެއެވެ." އިބުރާ ވިދާޅުވިއެވެ.
ކުޑަރަށެއް ބޮޑުރަށެއް ބެލުމެއް ނެތި ތަރައްގީގެ މަޝްރޫއުތައް ހިނގުމަކީ މިސަރުކާރުން ވަރަށް ބޮޑު ސަމާލުކަމެއް ދީގެން ކުރަމުން އަންނަ މަސައްކަތަކަށްވާއިރު ސަރުކާރާއި އިދިކޮޅު ފަރާތްތަކުން ދަނީ އެއީ ސަރުކާރުން ކުރާ ބޭކާރު ހަރަދެއްކަމަށް ބުނަމުންނެވެ. އަދި ރައީސް ނަޝީދުވެސް މި ސިޔާސަތައް ފާޑުވިދާޅުވެފައިވާއިރު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހްގެ ސަރުކާރުން ތަރައްޤީ ގެންނަވަމުން ދަނީ ކުޑަރަށެއް ބޮޑުރަށެއް ތަފާތުކުރުމެއް ނެތިކަމަށާއި ކުޑަރަށަށް އަޅާނުލައި ކުޑަ ރަށްރަށުގެ ރައްޔިތުން ތިބެންޖެހޭނީ ގައިން ތާހިރު ނުވެކަމަށް ދެކިވަޑައިގަންނަވާނަމަ އެއީ އެމްޑީޕީގެ ފިކުރު ނޫންކަމަށް ވިދާޅުވެ، މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވަނީ ނަޝީދަށް ފާޑު ވެސް ވިދާޅުވެފައެވެ.
