އުމްރާގެ އަޅުކަން އަދާކުރަމުން ދިޔަ ދިވެއްސަކު ނިޔާވެއްޖެ
އުމްރާގެ އަޅުކަން އަދާކުރަމުން ދިޔަ ދިވެއްސަކު ނިޔާވެއްޖެއެވެ.
ނިޔާވެފައިވަނީ އަލް ބުރޫޖް ހައްޖު އުމްރާ ގުރޫޕުގެ ހަވާލުގައި އުމްރާއަށް ގޮސް އުޅުނު ގއ ކޮލަމާފުށީ ގަސްދޮށުގެ އުމުރުން 83 އަހަރުގެ މުޙައްމަދު ޒަކީކަމަށް އެގުރޫޕުން މައުލޫމާތު ދެއްވައެވެ.
"1444 ހ ވަނަ އަހަރު ރަމަޟާން މަހު ޢުމުރާއަށް ވަޑައިގަތް ބޭފުޅެއްކަމުގައިވާ، ގއ ކޮލަމާފުށީ ގަސްދޮށުގެ މުޙައްމަދު ޒަކީ 83 އަހަރު، 25 އޭޕްރީލް 2023 ވިލޭރޭ މައްކާ ގަޑިން 12 ޖަހާ ކަންހާއިރު ވަނީ ދެމިއޮތުމުގެ ޢާލަމަށް ދަތުރު ކުރައްވާފައެވެ. إِنَّا للهِ وَإِنَّا إِلَيْهِ رَاجِعُونَ" އަލް ބުރޫޖުް ހައްޖު އުމްރާ ގުރޫޕުން ބުނެފައިވެއެވެ.
އެގުރޫޕުން މައުލޫމާތު ދިން ގޮތުގައި އަލްމަރްޙޫމް މުޙައްމަދު ޒަކީ ނިޔާވެފައިވަނީ މަދީނާ ޒިޔާރަތުގައި 2 ދުވަސް ހޭދަކުރުމަށްފަހު މިދަތުރުގައި އިތުރު ޢުމުރާއެއް ކުރުމަށް މަދީނާގެ މީޤާތު ޛުލް ޚުލައިފާއިން އިޙްރާމް ބަނދެގެން އައިސް މައްކާގެ ހޮޓަލަށް ފޯރިތާ ދާދި ކުޑަ ހިނދުކޮޅެއްގެ ތެރޭގައެވެ. އަދި މިދަތުރުގައި އެބޭފުޅާއާއެކު މައްޔިތާގެ ޢާއިލާގެ ބޭފުޅުންގެ ތެރެއިން އެބޭފުޅާގެ ހުވަފަތްވި އަނބިކަނބަލުންނާއި 2 ފިރިހެން ދަރީންނާއި އަންހެން ދަރިކަނބަލަކާއި ދެ ދަނބިދަރީން ބައިވެރިވެފައިވާކަމަށްވެސް އެގުރޫޕުން ވަނީ ބުނެފައެވެ.
އެގުރޫޕުން އިތުރަށް ބުނިގޮތުގައި ޖިއްދާގައި ހުންނަ ދިވެހި ކޮންސިއުލޭޓާއި މައްކާގައި ކިޔަވަން ތިއްބަވާ ދިވެހި ދަރިވަރުންގެ އެހީތެރިކަމާއެކު މިހާރު ދަނީ ޒަކީގެ ޖަނާޒާގެ ކަންކަން ކުރިޔަށް ގެންދިޔުމަށް ސަޢޫދީ ޢަރަބިއްޔާގެ ޢުމުރާ އެޖެންޓާއެކު މަސައްކަތް ކުރަމުންނެވެ. މިވަގުތު މައްޔިތާ ބޭއްވިފައިވަނީ މައްކާގެ ކިންގް ފައިޞަލް ހޮސްޕިޓަލްގެ މޯރޗަރީގައިކަމަށާއި ހޮސްޕިޓަލުން ދޫކުރާ ލިޔުންތައް ލިބުމާއެކު ހިނެވުމަށްޓަކައި މައްކާގެ ޖާމިޢުލް މުހާޖިރީން ހިނަވާގެއަށް ގެންދެވޭނެ ކަމަށް އެގުރޫޕުން ބުނެފައިވެއެވެ.
އިންނާ ލިއްލާހި ވަ އިންނާ އިލައިހި ރާަޖިޢޫން