ހިޔާ ފުލެޓުގެ ކުލި ކުޑަކުރީކީ ނޫން، ކުލި ދެއްކުމުގައި ލުއި ގޮތްތަކެއް ހައްދަވައިދެއްވީ: އަކުރަމް

ރައީސުލްޖުމްހޫރިއްޔާވަނީ ހިޔާ ފުލެޓުގައި ދިރިއުޅުއްވާ ހުރިހާ ރައްޔިތުންނަށް ވަކި ފަރާތެއް ތަފާތުނުކޮށް ހުރިހާ އާއިލާތަކަށް ކުލި ދެއްކުމުގައި ލުއި ގޮތްތަކެއް ހޯއްދަވައިދެއްވުމަށް ނިންމަވައިފައިކަމަށާ ކުލި ކުޑަކޮށްދެއްވީ ނޫންކަމަށް ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި، ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އަކުރަމް ވިދާޅުވީ، މި ލުޔާއިއެކު 7 އަހަރު ވަންދެން ކުލީގެ ގޮތުގައި ދައްކަން ޖެހޭނީ 5،300 ރުފިޔާ ކަމަށެވެ.
"އަޅުގަނޑު ފާހަގަކޮށްލަން ތަކުރާރުކޮށް އަޅުގަނޑު މި އިޢުލާނުކުރަނީ ހިޔާ ފުލެޓުގެ ކުލި ދެއްކުމުގެ ގޮތުން ލުއި ހޯދައިދިނުމަށް ކުލި ކުޑަކުރަނީކީ ނޫން އިނގޭތޯ ކުލި ކުޑަކުރުމެއް ނޫން މީކީ ކުލި ދެއްކުމުގައި ލުއި ގޮތެއް ރައީސްޖުމްހޫރިއްޔާ މި ހޯއްދަވައިދެއްވީ މިގޮތުން މިހާރު ނިންމާފައިވަނީ ކުރިން ދައްކަމުން އައި 7500 ރުފިޔާގެ ބަދަލުގައި ހަތް އަހަރު ދުވަހުގެ މުއްދަތައް ކޮންމެ އަހަރަކު 5300 ރުފިޔާ ދައްކާގޮތަށް." އަކުރަމް ވިދާޅުވިއެވެ.
މި ނޫސްވެރިންގެ ބައްދަލުވުމުގައި އާބަންކޯގެ އެމްޑީ އަޙްމަދު އާތިފްވެސް ވިދާޅުވީ 5،300 ރުފިޔާއަށް ހިޔާގެ ކުލި ބަދަލުކުރީ، ހަތް އަހަރުގެ ދުވަހުގެ މުއްދަތަކަށް ކަމަށާއި ކުލި ކުޑަ ކުރީ ނޫންކަމަށެވެ.
އަދި ހަތް އަހަރު ދުވަހުގެ ފަހުން މިހާރުވެސް ދައްކަމުން ގެންދާ ގޮތަށް 7،500 ރުފިޔާއަށް ކުލި ބަދަލުވެގެންދާނެ ކަމަށެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.