މީގެ 98 ދުވަސް ފަހުން މިވެރިކަން ބަލި ކުރާނަން: ވައްޑޭ
މީގެ 98 ދުވަސް ފަހުން ސެޕްޓެމްބަރު 9 ގައި އިރާދަ ކުރެއްވިއްޔާ މިވެރިކަން ބަލި ކުރައްވާނެ ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑޭ) ވިދާޅުވެއްޖެއެވެ.
"ބާނާ ބާނަ ތިއްބާ ތިޔަ ވިއްކާލީ ކަނޑު" ގެ ނަމުގައި މިރޭ ކާނިވާ ސަރަހައްދުގައި ބޭއްވި ޖަލްސާގައި ވާހަކަ ދައްކަވަމުން ވައްޑޭ ވިދާޅުވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ހުންނެވީ ގައުމަށް ޣައްދާރުވެފައިކަމަށެވެ.
"ނޫ ކަނޑާ ޖަޒީރާތަކޭ ކިޔާ މުޅިކަނޑު ދިވެހި މަސްވެރިންނަސް ޖާގަ ހަދަން ދޭނަމޭ ކިޔައި ވައުދުވެގެން ޑެންމާކަށް ވުރެ ބޮޑު ސަރަހައްދެއް ދިވެހި ކަނޑުން ރައީސް އިބްރާހިމް މުހައްމަދު ޞާލިހު ދޫކޮށްލައްވައިފި އަޅުގަނޑު ދަންނަވަން ބޭނުން ތިޔަ ހުންނެވީ މިގައުމަށް ހިޔާނާތްތެރިވެގެން ތިޔަ ހުންނެވީ ގައްދާރުވެގެން ގަބު ކަމުގައި ގަމާރު ކަމުގައި ހުންނަވައިގެން ތިޔަ ހުންނެވީ އެންމެ ބޮޑު ގޯސް ހެއްދެވިގެން" ވައްޑޭ ވިދާޅުވިއެވެ.
އޭނާ އިތުރަށް ވިދާޅުވީ ރައްޔިތުންގެ މަސްބާނަ ބާނާ ތިއްބާ ކުއްލިއަކަށް އެހެންބަޔަކަށް ދީފައިވާކަމަށެވެ. އަދި އެސަރައްދު ދީފައިވަނީ މާދުރު އެހެން ބައްރެއްގެ ބަޔަކަށް ކަމަށް ބުނެ އޭނާ ވަނީ ފާޑުކިޔުއްވާފައެވެ.
"މިރާއްޖޭގެ ރައްޔިތެއް ކައިރީ އަހާނުލައި ގާނޫނު ހަދާ މަޖިލީހުގައި އަހާނުލާ ބައްލަވާ މިރާއްޖޭގެ ދެކުނު ކަނޑުގައި މަސްވެރިން ބޭރު ކަނޑަށް ނުކުމެ އަބަދު ބާނަ ބާނަ ތިބިތަން ކުރިން އަތުން ދުރުމި އަޅާލާފަ ލައްޓި ޖަހާ ހިސާބު ކުއްލިއަކަށް އެހެންގައުމެއްގެ ބަޔަކަށް އަޅުގަނޑުމެން ދުރުމި އަޅާލާފައި ކުރަނގި ޖަހާ ހިސާބު ކުއްލިއަކަށް އެހެންބަޔަކަށް އަދި އެތާ މާދުރުގައި އޮތް އެހެން ބައްރެއްގެ ބަޔަކަށް އެފްރިކާ ބައްރުގެ ގައުމެއްގެ ބަޔަކަށް ދިވެހި ރާއްޖޭގެ ބޮޑުބައެއް ހަދާލައިފި" ވައްޑޭ ވިދާޅުވިއެވެ.
ވައްޑޭ ވިދާޅުވީ އެކަން ދިފާއު ކުރެއްވުމަށް ސަރުކާރުން ދޮގު ހައްދަވަމުން ދާކަމަށެވެ. އަދި އެއީ ބޮޑު ކާމިޔާބެއްކަމަށް ބުނެ އެކަން ނޫސްތަކުގައި ލިޔުއްވާފައިވާކަމަށް ވައްޑޭ ވަނީ ތުހުމަތު ކުރައްވާފައެވެ. އަދި އެއީ އެހާ ބޮޑު ކާމިޔާބެއް ނަމަ ރަތް ދޫލައިން މަރުހަބާ ކިޔާނެކަމަށް ވައްޑޭ ވިދާޅުވިއެވެ.
