އީވާގެ މައްސަލައިގައި ހައްލު ހޯއްދަވައިދެއްވުމަށް ނަޝީދު އަރިހުން އަމީންއާންމު އެދިއްޖެ

ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ގެ އިތުބާރު ނެތްކަމަށް ހުށަހެޅިފައިވާ މައްސަލަ ކުރިއަށް ގެންދިއުމަށް ގޮތެއް ހޯއްދަވައިދެއްވުމަށް މަޖިލީހުގެ ރައީސް މުހައްމަދު ނަޝީދުގެ އަރިހުން އަމީންއާންމު ފާތިމަތު ނިއުޝާ އެދިވަޑައިގެންފި އެވެ.

Ads by STELCO

އީވާގެ މައްސަލަ މަޖިލީހުގެ މިއަދުގެ ޖަލްްސާއަށް އެޖެންޑާ ކުރިނަމަވެސް ރިޔާސަތު ބަލަހައްޓަވާނެ ބޭފުޅަކު ނެތިގެން ޖަލްސާ ކުރިއަކަށް ނުގެންދެވުނެވެ. މަޖިލީހުގެ ގަވާއިދު ބުނާ ގޮތުން ނައިބު ރައީސްގެ އިތުބާރު ނެތްކަމުގެ މައްސަލަ ބައްލަވަން ޖެހޭނީ ރައީސް ރިޔާސަތުގައި އިންނަވައިގެންނެވެ. އެހެންނަމަވެސް ރައީސް ނަޝީދު ވަނީ އެމަނިކުފާނުގެ އިތުބާރު ނެތްކަމުގެ މައްސަލައެއް މަޖިލީހަށް ހުށަހެޅިފައިވަނިކޮށް ރިޔާސަތުގައި އިންނަވަން އުޒުރުވެރިވެވަޑައިގަންނަވާކަމަށް އަމީންއާންމަށް އަންގަވައިފަ އެވެ.

ރައީސް ނަޝީދަށް އެޑްރެސްކޮށް ނިއުޝާ މިއަދު ފޮނުއްވި ސިޓީއެއްގައި ވަނީ އީވާގެ މައްސަލަ ކުރިއަށް ގެންދެވޭނެ ގޮތްތަކަކާއިމެދު ރައީސް ނަޝީދަށް ލަފާވެސް އަރުވައިފަ އެވެ. އެގޮތުން އީވާގެ މައްސަލަ ކުރިއަށް ގެންދިޔުމަށް ބަހުސްގެ ވަގުތު ކަނޑަނޭޅި އޮތީ އާންމު ކޮމިޓީ އެކުލަވާނުލެވި އޮތުމުންކަމަށްވިޔަސް އެއީ މައްސަލަ ކުރިއަށް ނުގެންގޮސް ބޭއްވިދާނެ ސަބަބެއްކަމަށް ދެކެވަޑައިނުގަންނަވާކަމަށް ނިއުޝާ ވިދާޅުވި އެވެ.

ބަހުސްގެ ވަގުތު ކަނޑައެޅުމަށް މަޖިލީހުގެ އާންމު ޖަލްސާއެއް ބާއްވައި މެމްބަރުންގެ މެދުގައި ގޮތެއް ކަނޑައެޅުމަށްފަހު ގޮތެއް ނިންމަން ނިއުޝާ ވަނީ ލަފާދެއްވައިފަ އެވެ. އަދި ރިޔާސަތުގައި އިންނަވަން ރައީސް ނަޝީދު އުޒުރުވެރިވެވަޑައިގަންނަވާނަމަ އެމަސްއޫލިއްޔަތު އެހެން ބޭފުޅަކާއި ހަވާލުކުރެއްވުމަށްވެސް އަމީންއާންމު ވަނީ ލަފާދެއްވައިފަ އެވެ.

ރައްޔިތުންގެ މަޖިލީހުގެ ޖަލްސާތައް ކުރިއަށް ނުގެންދެވި މަޖިލީހުގައި އޮތީ މަރުތަޅު އެޅުވިފަ އެވެ. އިދިކޮޅު ޕާޓީތަކުން ދެކޭ ގޮތުގައި މި މަރުތަޅު ނެއްޓޭނީ ރައީސް ނުވަތަ ނައިބުރައީސްގެ އިތުބާރު ނެތްކަމުގެ މައްސަލައިގެ ތެރެއިން ކޮންމެވެސް އެއް މައްސަލައެއް އަނބުރާ ގެންގޮސްގެންނެވެ. އެހެންނަމަވެސް ސަރުކާރު މެމްބަރުން ދެކެނީ ރައީސް ނަޝީދަށް ގަވާއިދުގެ ތެރެއިން ލިބޭ 14 ދުވަހުގެ މުއްދަތުގެ ތެރޭގައި އީވާގެ މައްސަލަ ކުރިއަށް ގެންގޮސް، ރައީސް ނަޝީދުގެ މައްސަލަ އާ ނައިބު ރައީސްގެ ރިޔާސަތުގައި ކުރިއަށް ގެންދެވޭނެ ކަމަށެވެ.