މީޑިއާ ކައުންސިލްގެ މެމްބަރުކަމަށް ކުރިމަތިލުމަށް ހުޅުވާލައިފި
މޯލްޑިވްސް މީޑިއާ ކައުންސިލް (އެމްއެމްސީ) ގެ މެމްބަރުކަމަށް ކުރިމަތިލުމަށް ހޯމް މިނިސްޓްރީން ހުޅުވާލައިފި އެވެ.
އެކައުންސިލްގެ މެމްބަރުކަމަށް ކުރިމަތިލުމަށް ހުޅުވައިލީ މިހާރު މެމްބަރުންކަން ކުރައްވަމުން ގެންދަވާ މުހައްމަދު ޝާފިއުގެ ދައުރު އަންނަ ސެޕްޓެމްބަރު މަހުގެ 10 އަށް ހަމަވާތީ އެވެ.
މީޑިއާ ކައުންސިލްގެ މެމްބަރެއްގެ ދައުރަކީ ދެ އަހަރެވެ. އަދި އެއްވެސް މެމްބަރަކަށް ވިދިވިދިގެން ދެ ދައުރެއްގެ މެމްބަރުކަން އަދައެއް ނުކުރެވެ އެވެ.
ހޯމް މިނިސްޓްރީން ކުރި އިއުލާނުގައި ބުނީ މިމަހު 16 ގެ ކުރިން މެމްބަރުކަމަށް ޝައުގުވެރިވާ ފަރާތްތަކުން އެކަމަށް އެދި ހުށަހެޅުމަށެވެ.
މީޑިއާ ކައުންސިލްގެ މެންބަރުންގެ ޝަރުތަކުގެ ތެރޭގައި 18 އަހަރުވެފައިވާ ދިވެއްސަކަށް ވުމާއި، ކުށެއް ކުރިކަން ޝަރީއަތަށް ސާބިތުވެފައި ނުވުމާއި، އަބުރުވެރި އަހްލާގު ރަނގަޅު މީހަކަށް ވުމުގެ އިތުރުން ވޭތުވެ ދިޔަ 12 މަހުގެ ތެރޭގައި ނޫހެއްގައި ލިޔުނު އެއްޗަކާ ގުޅިގެން ޝަރީއަތަށް ކުށެއް ސާބިތުވެފައި ނުވުން ހިމެނެ އެވެ.
މީޑިއާ ކައުންސިލަކީ މައިގަނޑުގޮތެއްގައި ރާއްޖޭގައި ހިންގާ ނޫސްތަކާއި ނޫސްވެރިންނާއި ގުޅުންހުރި އެހެންވެސް އިދާރާތައް މޮނިޓާކޮށް ރެގިއުލޭޓު ކުރާ ކައުންސިލް އެވެ. އެކައުންސިލްގައި 13 މެމްބަރުން ތިއްބަވަ އެވެ. އެއީ މީޑިއާތަކުން އިންތިހާބު ކުރާ 7 މެމްބަރުންނާއި އާންމުންގެ ފަރާތުން 6 މެމްބަރުންނެވެ.
Ads by STO
