ރައީސް ޔާމީނާ މެދު ރަނގަޅަށް ކަންތައް ކުރެއްވުމަށް ޝަހީމް، އިމްރާންގެ ކިބައިން އެދިވަޑައިގެންފި
ކުރީގެ ރައީސް އަބްދުﷲ ޔާމީނާއި މެދު ރަނގަޅަށް ކަންކަން ކޮށް ދެއްވުމަށް ހޯމް މިނިސްޓަރު އިމްރާން އަބްދުﷲ ގެ ކިބައިން ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އެދިވަޑައިގެންފިއެވެ.
ޝަހީމް މިފަދައިން ވިދާޅުވެފައި މިވަނީ ޔާމީންގެ ވަކީލު ބައްދަލުވުން ހަމަޖައްސަން އެއްވެސް ކޯޓަަކުން އޭނާގެ މައްޗަށް އަމުރެއް ނެރެފައި ނުވާ ކަމަށް އިމްރާން ވިދާޅުވެފައިވާތީ ޔާމީންގެ އާއިލާއިން ކަންބޮޑުވުން ފާޅުކޮށްފައި ވަނިކޮށެވެ.
އެގޮތުން ޝަހީމް ކުރެއްވި ޓްވީޓެއްގައި ވަނީ ރައީސް ޔާމީނަށް ކުރިމަތިވަމުންދާ އިހާނެތި ކަންތައްތަކާއި މެދު ހިތާމަ ކުރައްވާ ކަމަށާއި އިމްރާން ހޯމް މިނިސްޓަރަކަށް ހުންނަވައިގެން ރައީސް ޔާމީނާ ދޭތެރޭ މިހާރަށްވުރެ ރަނގަޅަށް ކަންކަން ކުރެއްވޭނެ ކަމަށެވެ.
"ރައީސް ޔާމީންގެ ވެރިކަން ނިމުނުއިރު ވެސް އިމްރާން ހުންނެވީ ގޭގައި،" ޝަހީމް ވިދާޅުވިއެވެ.
އިމްރާން އިއްޔެ ވިދާޅުވީ ޔާމީންގެ ވަކީލު ބައްދަލުވުން ހަމަޖައްސަން ރާއްޖޭގެ އެއްވެސް ކޯޓަކުން އޭނާގެ މައްޗަށް އަމުރެއް ނެރުއްވާފައި ނެތް ކަމަށެވެ. އަދި ބައްދަލުވުން ހަމަޖައްސަން މޯލްޑިވްސް ކަރެކްޝަނަލް ސާވިސްގެ އިސްނެގުމަށް ލައްކަ މަސައްކަތް ކުރެވިފައިވާ ކަމަށްވެސް އިމްރާން ވިދާޅުވިއެވެ.
