ރިޔާސީ އިންތިހާބުގައި އަމިއްލަ ގޮތުން ވާދަ ކުރެއްވުމަށް ފާރިޝް ސޮއި ހަމަކޮށްފި
އަންނަ ސެޕްޓެންބަރު މަހު އޮންނަ ރިޔާސީ އިންތިޚާބުގައި މޯލްޑިވްސް ރިފޯމް މޫވްމެންޓްގެ ރައީސް, ފާރިސް މައުމޫން އަމިއްލަ ގޮތުން ވާދަކުރެއްވުމަށް ސޮއި ހަމަކޮށްފިއެވެ.
ފާރިސް މައުމޫން އަމިއްލަ ގޮތުން ވާދަ ކުރައްވަން ހުށަހަޅަން ޖެހޭ 1,500 މީހުންގެ ސޮއި ހޯދުމުގެ މަސައްކަތް ފަށާފައިވަނީ މިމަހުގެ 25 ވަނަ ދުވަހުއެވެ.
އެމްއާރުއެމުން މިއަދު ވިދާޅުވީ އީސީއަށް ހުށަހަޅަން ބޭނުންވާ އަދަދަށް 1،500 މީހުންގެ ތާއީދު ސޮއި ފާރިސް މިހާރު ހަމަކޮށްފައިވާ ކަމަށާއި ނަމަވެސް އަދިވެސް އިތުރަށް ސޮއި ހޯދުމުގެ މަސައްކަތް ކުރަމުންދާ ކަމަށެވެ.
ގާނޫނުން ލާޒިމްކުރާ މެންބަރުންގެ އަދަދު ހަމަނުވުމުން އެމްއާރްއެމް އުވާލަން އިލެކްޝަން ކޮމިޝަނުން ވަނީ ނިންމާފައެވެ. އެކަން ބަލައިނުގަނެ, އެމްއާރުއެމްއިން ވަނީ ކޯޓަށް ހުށަހަޅާފައެވެ.
މީގެ ކުރިން އީސީން ވަނީ ކޯޓުން ގޮތެއް ނުނިމެނީސް ރިޔާސީ ކެންޑިޑޭޓަކަށް ވާދަކުރެވޭނެއޭ، ނުކުރެވޭނެއޭ ބުނަން ދަތި ކަމަށް ވިދާޅުވެފައެވެ.
މިއަހަަރުގެ ރިޔާސީ އިންތިޚާބަށް ކުރިމަތި ލެވޭނީ 100,000 ރުފިޔާއާއި 1,500 މީހުންގެ ސޮއިއާއެކުގައެވެ.
Ads by STO
