އިލްޔާސް ލަބީބުގެ ކެންޑިޑެސީ ފޯމު އިލެކްޝަންސް އިން ބަލައިގަނެފި

ދަ ޑިމޮކްރެޓްސްގެ ފަރާތުން ރިޔާސީ އިންތިހާބަށް ކުރިމަތިލައްވާ އިލްޔާސް ލަބީބުގެ ކެންޑިޑެސީ ފޯމު އިލްކްޝަންސް ކޮމިޝަންސް (އީސީ) އިން ބަލައިގަނެފައިވާކަމަށް އެކޮމިޝަނުން ބުނެފިއެވެ.
މިކަމަށްޓަކައި ދަރުބާރުގޭގައި ބޭއްވި ރަސްމިއްޔާތުގައި ފޯމު ހުށަހަޅުއްވާފައިވަނީ އިލްޔާސް ލަބީބެވެ. އަދި އީސީގެ ފަރާތުން ފޯމާ ޙަވާލުވެވަޑައިގެންނެވީ އީސީގެ ރައީސް ފުއާދު ތައުފީޤެވެ. މި ރަސްމިއްޔާތުގައި ރިޔާސީ ކެނޑިޑޭޓް އިލްޔާސް ލަބީބާއެކު ރަނިންމޭޓު އަދި ކުރީގެ އެސްޓީއޯގެ މެނޭޖިންގ ޑިރެކްޓަރ ޙުސައިން އަމްރު ބައިވެރިވެވަޑައިގެންނެވިއެވެ.
އިއްޔެ ހުށަހެޅި ފޯމުގައި މައްސަލަތަކެއް ހުރުމުން އެ ފޯމު ބަލައިނުގަތުމަށް އީސީން ވަނީ ނިންމާފައެވެ. ފޯމު ބަލައިނުގަތީ އިލްޔާސްގެ އިންތިހާބީ އޭޖެންޓު ފާތިމަތު ނިއުމާގެ މައްޗަށް ސާބިތު ދަރަންޏެއް ނެތްކަން ސާބިތުކޮށްދެވިފައި ނުވާތީކަމަށް މަޢުލޫމާތުލިބިފައިވެއެވެ.
ލިޔެކިޔުންތައް ހަމަކުރުމަށްފަހު އިލްޔާސް މިއަދު ފޯމު ހުށަހަޅުއްވާފައިވާތި، އޭނާގެ ކެންޑިޑެސީ ބަލައިގަނެފައިވާކަމަށް އީސީގެ ނާއިބު ރައީސް އިސްމާޢީލް ޙަބީބު ވަނީ ޓްވީޓުކުރައްވާފައެވެ.
https://twitter.com/IsmailHabeeb/status/1688424891312406528
މި އަންނަ ސެޕްޓެންބަރު މަހު 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި ވާދަކުރުމުގެ ފުރުޞަތު މިއަދު މެންދުރު 2:00 ގައި ހަމަވާނެއެވެ.
ރިޔާސީ އިންތިޚާބުގައި ވާދަކުރެއްވުމަށް މިހާތަނަށް ކެންޑިޑަސީ ފޯމު ހުށަހަޅުއްވާފައިވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، އިދިކޮޅު އިއްތިހާދުގެ ކެންޑިޑޭޓު ޑރ. މުޙައްމަދު މުޢިއްޒާއި، ޖުމްހޫރީ ޕާޓީގެ ކެންޑިޑޭޓު ޤާސިމް އިބްރާހީމާއި އެމްއެންޕީގެ ކެންޑިޑޭޓު ކާނަލް ރިޓަޔާޑް މުޙައްމަދު ނާޒިމެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.