ދައުލަތުގެ ލިޔެކިޔުން ނައްތާލުން ފަދަ އަމަލުތަކަކީ ތަހުގީގުތަކަށް ހުރަސް އެޅޭނެ ކަމެއް: އޭސީސީ
ދައުލަތުގެ ލިޔެކިޔުން ނައްތައިލުން ފަދަ އަމަލުތަކަކީ ތަހުގީގުތަކަށް ހުރަސް އެޅޭނެ ކަމެއް ކަމަށް އެންޓި ކޮރަޕްޝަން ކޮމިޝަން (އޭސީސީ) އިން މިއަދު ބުނެފިއެވެ.
އޭސީސީން މިހެން ބުނެފައި ވަނީ އެފްއެސްއެމްގެ ގިނަ އަދަދެއްގެ ލިޔެކިޔުންތަކެއް ކޮންކްރީޓް ގަށާ މެޝިނަކަށް އެޅުމަށްފަހު ނައްތާލަމުންދިޔަ ވީޑިއޯއެއް ސޯޝަލް މީޑިއާގައި އާންމުވުމާއެކު އެކަމަށް އިޝާރަތްކޮށެވެ.
އެގޮތުން އޭސީސީން މިއަދު ބުނީ ދައުލަތުގެ ލިޔެކިޔުމަށް ބަދަލު ގެނައުމާއި ލިޔެކިޔުން ނައްތައިލުން ނުވަތަ ފޮރުވުންފަދަ އަމަލުތަކަކީ އެ ކޮމިޝަނުން ހިންގާ ތަހުގީގުތަކަށް ހުރަސްއެޅޭނެ އަމަލެއް ކަމަށްވާތީ އެފަދަ އަމަލުތައް ހުއްޓާލުމަށް ގޮވާލާ ކަމަށެވެ.
އެފަދަ ކަމެއް ކުރުމަށް ވަކި ފަރާތަކުން އަންގާ ހާލަތެއްގައި އެފަދަ އަމަލުތަކުން ދުރުހެލިވެ ނަޒާހަތްތެރިކަން އިސްކުރުމަށާއި އެފަދަ އަމަލުތައް ހިންގާކަމުގެ މައުލޫމާތު ލިބޭނަމަ އެކަން އެ ކޮމިޝަނަށް ހުށަހެޅުމަށް ވެސް އޭސީސީން ވަނީ އެދިފައެވެ.
މީގެ އިތުރުން އޭސީސީން ބުނީ ސަރުކާރުގެ އަދި ސަރުކާރު ހިއްސާވާ ކުންފުނިތަކުގެ މިފަދަ އަމަލުތައް ހުއްޓުވައިދިނުމަށް ޕީސީބީގައި އެދިފައިވާނެ ކަމަށެވެ.
Ads by STO
