ދިވެހިރާއްޖޭގެ ޒަކާތު ހައުސް ރައީސް އިފްތިތާޙް ކޮށްދެއްވައިފި
ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ މެނިފެސްޓޯގައި ހިމަނުއްވާފައިވާ އިސްލާމީ ޝަރީޢަތުގެ އަލީގައި، ޒަމާނީ ޓެކްނޮލޮޖީގެ ބޭނުން ހިފައިގެން ޤާއިމްކުރެވޭ ޒަކާތާއި ޞަދަޤާތުގެ ޢަދުލުވެރި އަދި ދެފުށްފެންނަ ނިޒާމެއްގެ ތެރެއިން، ޒަކާތްނެގުމާއި އޭގެ ބެހެނިވެރިންނަށް ފޯރުކޮށްދިނުމާއި ފުދުންތެރި މުޖުތަމަޢެއް ބީނާކުރުމުގެ ދަށުން ދިވެހިރާއްޖޭގެ ޒަކާތު ހައުސް މިއަދު އިފްތިތާޙުކޮށްފިއެވެ.
ދިވެހިރާއްޖޭގެ ޒަކާތު ހައުސް އިފްތިތާޙުކުރުމުގެ ޙަފްލާ ޝަރަފުވެރިކޮށްދެއްވާފައި ވަނީ ރައީސް މުޢިއްޒުއެވެ.
ދިވެހިރާއްޖޭގެ ޒަކާތު ހައުސް އިފްތިތާޙުކޮށްފައިވަނީ އިސްލާމީ މަރުކަޒުގައި މިއަދު ހެނދުުނު ކުރިއަށްގެންދިޔަ ޙަފްލާއެއްގައެވެ.
ދިވެހިރާއްޖޭގެ ޒަކާތު ހައުސްގެ ލޯގޯއާއި ކުލަ މި ހަފްލާގައި ދައްކާލައިފައިވާ އިރު، ޒަކާތުގެ މުހިންމުކަން އަންގައިދޭ ވީޑިއޯ ރިޕޯޓެއްވެސް ގެނެސްދީފައިވެއެވެ.
މި ޙަފްލާގައި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވަނީ ވާހަކަފުޅު ދައްކަވާފައެވެ.
ވަޒީރު ޑރ. ޝަހީމް ވަނީ، ދިވެހިރާއްޖޭގެ ޒަކާތު ހައުސް އުފެއްދެވުމުން ރައީސް މުޢިއްޒުއަށް ޝުކުރު އަދާކުރައްވާފައެވެ.
ހަމަ އެހެންމެ ވަޒީރު ޝަހީމް ވަނީ ޒަކާތު ހައުސްއެއް ރާއްޖޭގައި ޤާއިމްކުރައްވަން ރައީސް މުޢިއްޒު ކުރެއްވި މަސައްކަތްޕުޅުތައް ފާހަގަކުރައްވާ އަގު ވަޒަންކުރައްވާފައެވެ.
މި ޙަފްލާގައި ވަޒީރުންނާއި، ސަރުކާރުގެ ވުޒާރާތުގެ އިސްވެރިން ބައިވެރިވެވަޑައިގެންފައި ވެއެވެ.
ޒަކާތު ހައުސްގެ ނަމުގައި ސަރުކާރުގެ އިދާރާއެއް ޤާއިމުކުރުމުގެ ބޭނުމަކީ ޒަކާތުގެ ނަފާ އޭގެ ބެހެނިވެރިންނަށް ފުޅާ ދާއިރާއެއްގައި ލިބޭނެގޮތަށް ޒަކާތު ފަންޑު ތަރައްޤީކޮށް އެ ނިޒާމު ހަރުދަނާ ކުރުމުގެ ބޭނުމުގައެވެ.
"ދިވެހިރާއްޖޭގެ ޒަކާތު ހައުސް" އަކީ ޤާނޫނުއަސާސީގެ 116 ވަނަ މާއްދާއިން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުން އުފެއްދެވި އިދާރާއެކެވެ.
މަރުޙަބާ!އެކަމަކު ތިން ޤަވްމުގެ ބަސް[ބަޙުރުވަ]ބޭނުންކުރަންޖެހުމަކީ،ހިތާމައެއް.ސަރުކާރުގެ އިދާރާތަކަށް ދިވެހިނަންކިޔާވާހަކަވެސް އިވިގެންދިޔަ..އިނގިރޭސިބަހާ، އިނގިރޭސި އަކުރަކީ ދުނިޔޭގެ އެންމެމަތީޢިލްމުކަމުގަ ދެކޭދަރަޖައަށް މިހާރުކަންކަން މިދަނީ..ފަޚުރުވެރި ދިވެހިމާދަރީބަސް ދޫކޮށްނުލަށްވާ…!ހުރިހާ ބޭފުޅުންނަށް ސަލާމް.