ލާމަރުކަޒީ ދުވަހުގެ ތަހުނިޔާ ފޮނުވަމުން މިނިސްޓަރު ވިދާޅުވީ މައްސަލަތަކަށް ހައްލު ހޯދައިދޭނެ ކަމަށް
ކައުންސިލުތަކަށް ދިމާވެފައިވާ މައްސަލަތަކަށް ހައްލު ހޯދައި ދެއްވުމަށް މަސައްކަތް ކުރައްވާނެ ކަމަށް މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް، އާދަމް ޝަރީފު އުމަރު މިއަދު ވިދާޅުވެއްޖެއެވެ.
މިނިސްޓަރު އެހެން ވިދާޅުވީ މިއަދު ފާހަގަކުރަމުންދާ ލާމަރުކަޒީ ދުވަހުގެ ތަހުނިޔާ ފޮނުވަމުންނެވެ.
ލާމަރުކަޒީ ދުވަހަކީ ކޮންމެ އަހަރެއްގެ ފެބްރުއަރީ މަހުގެ 26 ވަނަ ދުވަހެވެ.
އެކްސްގައި ކުރެއްވި ޕޯސްޓެއްގައި މިނިސްޓަރު ވިދާޅުވީ ކައުންސިލުތަކަށް ހުރި ގޮންޖެހުންތައް ދެނެގަނެ، އެކަންތައްތަކަަށް ހައްލު ހޯދުމަށް މަސައްކަތް ކުރަމުންދާ ކަމަށެވެ. އަދި ކާމިޔާބަކީ ކައުންސިލްތަކާއި މިނިސްޓްރީ އާއި ދެމެދު އޮތް ގުޅުމާއި އިތުބާރުކަމަށްވެސް މިނިސްޓަރު ވިދާޅުވިއެވެ.
އަދި ބައްދަލުވި ކައުންސިލްތަކުން އެންމެ ބޮޑަށް އެދިފައިވަނީ އެ ކައުންސިލްތައް ބާރުވެރިވެގެން ދިޔުމަށާއި، މާލީ ގޮތުން ތަނަވަސްކަން ލިބޭނެ ގޮތެއްގެ މަތިން ކަަންކަން ކުރެވޭނެ ނިޒާމެއް ފަހިކޮށްދިނުން ކަމަށެވެ. އެކަން ފަހިކޮށްދިނުމަށްޓަކައި ރައީސް ވަނީ ކައުންސިލްތަކަށް އާމްދަނީ ލިބޭނެ ގޮތުގެ އިންތިޒާމު ހަމަޖެއްސުމަށްޓަކައި ވަޒީރުންގެ މަޖިލީހުގައި މަޝްވަރާކުރައްވާފައެވެ. އެ ނިންމުމާއި އެކު ކޮންމެ ކައުންސިލަކަށް ބޭނުންވާ ފަޅުރަށެއްވެސް މިހާރު ވަނީ ހަމަޖައްސާފައެވެ.
