ވިލިނގިއްޔަށް ބަލި މީހާ ނޭރުވި މައްސަލަ ބަލަނީ
ގދ. ތިނަދޫ އިން ކޮވިޑް-19 އަށް ފައްސިވި މީހާ، ގއ. ވިލިނގިއްޔަށް ނޭރުވި މައްސަލަ އިތުރަށް ބަލާނެ ކަމަށް ހެލްތް އިމަރޖެންސީ އޮޕަރޭޝަން ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ މިކަން ހިނގާދިޔަގޮތާއި ގުޅޭ ރިޕޯޓެއް ތައްޔާރުކުރުމުގެ މަސައްކަތް އެ އެޗްއީއޯސީން ކުރަމުންދާކަމަށާއި މިފަދަ މައްސަލަތަކަކީ ސީރިއަސް މައްސަލައެއްގެ ގޮތުގައި ބަލައި އަޅަންޖެހޭ ފިޔަވަޅުތައް އަޅުއްވާނެ ކަމަށެވެ.
"މިހާރު އަޅުގަނޑުމެން މިދަނީ މިކަން ހިންގައިދިޔަ ގޮތް ބެލުމަށް ރިޕޯޓެއް އެކުލަވާލަމުން. މިކަން ބެލުމަށްފަހު އަޅަންޖެހޭ ފިޔަވަޅުތައް އަޅާނަން." ޑރ. ނަޒްލާ ވިދާޅުވިއެވެ.
ވިލިނގިލީގައި ހުންނަ ކޮވިޑް-19 ފެސިލިޓީއަށް، އިތުރު ފަރުވާއަށް ގެންދިޔަ ފައްސިވި ބަލިމީހަކު އެ ރަށަށް އެރުވުމާއި ދެކޮޅަށް އެރަށުގެ މަދު ބަޔަކު ނުކުމެވަނީ ހުރަސް އަޅާފައެވެ. ވިލިނގިއްޔަށް ފަރުވާއަށް އެރިޔަ ނުދީ ފޮނުވާލާފައިވަނީ، ތިނަދޫއިން ބައްޔަށް ފައްސިވި އުމުރުން ދުވަސްވީ މީހެކެވެ.
Ads by STO
