ބަލި މީހާ ރަށަށް ނޭރުވީ ސިޔާސީ ބައެއް، އެކަން ކުށްވެރިކުރަން: ވިލިނގިލީ ކައުންސިލް
ގއ. ވިލިނގިލީގައި ހަދައިފައިވާ ކޮވިޑު ފެސިލިޓީއަށް ގދ. ތިނަދޫއިން އިއްޔެ ގެންދިޔަ ބަލި މީހާއަށް ފަރުވާ ދިނުމަށްޓަކައި އެރަށަށް ނޭރުވީ، އިދިކޮޅު ޕާޓީ ޕީޕީއެމް އަށް ނިސްބަތްވާ ރަށުގެ މަދު ބައެއް ކަމަށާއި އެކަން ހަރުކަށިކޮށް ކުށްވެރި ކުރާ ކަމަށް ވިލިނގިލީ ކައުންސިލުން ބުނެފިއެވެ.
ތިނަދޫއިން ކޮވިޑު-19 އަށް ފައްސިވެފައިވާ އުމުރުން 68 އަހަރުގެ މި ފިރިހެންމީހާ، ވިލިނގިޅިގައި ގާއިމު ކުރެވިފައިވާ ކޮވިޑު ފެސިލިޓީއަށް ބަދަލު ކުރުމަށް އެރަށަށް ގެންދިޔުމުން އެރަށު ބަޔަކު ވަނީ އަތިރިމައްޗަށް ނުކުމެ މުޒާހަރާވެސް ކޮށްފައެވެ.
ގއ. ވިލިނގިލި ކައުންސިލުން މިއަދު ނެރުނު ބަޔާނެއްގައި ވާގޮތުން، ސިޔާސީ ބަޔަކު ހިންގި އެ އަމަލަކީ ވަރަށްވެސް ނާތަހުޒީބު އަދި ދަށު ދަރަޖައުގެ ޢަމަލެއް ކަމަށާއި، އެކަމާއެރަށު ރައްޔިތުން ކަންބޮޑުވެ ހިތާމަ ކުރާ ކަމަށް ގއ. ވިލިނގިލި ކައުންސިލުން މިއަދު ނެރުނު ބަޔާނެއްގައި ވެއެވެ. އަދި އެ އަމަލު ހިންގި ފަރާތްތަކާއި މެދު، ގާނޫނުގައި އޮންނަ އެންމެ ހަރުކަށި ފިޔަވަޅު އެޅުމަށް ގޮވާލައިފައިވާކަމަށްވެސް މިއަދު ނެރުނު ބަޔާނުގައި ވެއެވެ.
ގއ. ވިލިނގިލީގައި ގާއިމު ކުރެވިފައިވާ ކޮވިޑު ފެސިލިޓީގައި އެބަލި މީހާއަށް ފަރުވާދިނުމަށް ގއ. ވިލިނގިލީގެ ބައެއް ރައްޔިތުން ދެކޮޅު ހެދުމާއި ގުޅިގެން، އެ ބަލި މީހާ ބަލައިސަރުކާރުގެ ފަރާތުން އެއާޓެކްސީއެއް ފޮނުވައި، މިހާރު އެ ބަލި މީހާއަށް ވަނީ ހުޅުމާލޭގައި ގާއިމު ކުރެވުފައިވާ ކޮވިޑު ފެސިލިޓީން ފަރުވާދޭންފަށާފައެވެ.
