ރައީސްގެ ރައްދު: ރައީސްކަން ކުރުމަކީ އިތުރުފުޅު ހެއްދެވުމަށް ލިބޭ ލައިސެންސެއް ނޫން
ރާއްޖޭގެ ރައީސްކަން ކުރެއްވުމަކީ އިތުރުފުޅު ހެއްދެވުމަށް ލިބިވަޑައިގަންނަވާ ލައިސެންސެއް ނޫން ކަމަށް ކުރީގެ ރައީސް އިބްރާހިމް މުހައްމަދު ސޯލިހަށް ރައްދު ދެއްވާ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ކުރީގެ ރައީސް އިބްރާހިމް މުހައްމަދު ސޯލިހު ގެންދަވަނީ ކުރިއަށް އޮތް މަޖިލިސް އިންތިޚާބުގެ ޖަލްސާތަކުގައި ބައިވެރިވެ ވަޑައިގަންނަވާ ޕީޕީއެމް/ޕީއެންސީގެސަރުކާރުގެ ބޮލުގައި އެތައް ތުހުމަތުތަކެއް އަޅުއްވަމުންނެވެ.
މި ތުހުމަތުތަކަަށް ރައްދުދެއްވާ ރައީސް ޑރ. މުއިއްޒު ވަނީ ރޭ ބޭއްވުނު ކެމްޕޭން ޖަލްސާއެއްގައި ކުރީގެ ރައީސް ސޯލިހުއަށް ރައްދުދެއްވާފައިއެވެ.
ރައިސް ވިދާޅުވީ ނިމިދިޔަ ފަސް އަހަރު ދުވަސް ތެރޭގައި އެމްޑީޕީގެ ސަރުކާރަށް ނުކުރެވުނު މަސައްކަތެއް ނިންމުމަށް ކަމަށް ވިދާޅުވެ ރައްޔިތުންގެ ތާއީދު ހޯދުމަށް އިދިކޮޅުން މަސައްކަތް ކުރަމުން އަންނަކަމަށެވެ.
"ތިމަންނަމެންގެ މެޖޯރިޓީ މަޖިލީހުގައި އޮތީމައޭ އެކަން ނުކުރެވިގެން އުޅެނީއޭ ކިޔައިގެން ދައްކަނީ ހުސް ބުހުތާނު ދޮގު."
ނިމިދިޔަ ސަރުކާރުން ފެށި ބިންވެރިޔާ ސްކީމް ފަދަ މަސައްކަތް އެންޓި ކޮރަޕްޝަންސް ކޮމިޝަން (އޭސީސީ)އިން ބަލަމުން ގެންދާކަމަށާއި، އަދި އެބޭފުޅުން ގޯތި ލިސްޓު އާންމު ނުކުރިކަމުގައި ވީނަމަވެސް އެ ގޯތިތަށް ބެހުމުގެ މަސައްކަތް މިހާރުގެ ސަރުކާރުން އަންނަނީ ގެޒްޓުގައި ޝާއިިރު ކުރެވިފައިވާ ގޮތަށް ކުރިއަށް ގެންދަމުން ކަމަށްވެސް އެމަނިކުފާނު ވަނީ ފާހަގަކުރައްވާފައިއެވެ.
އަދި މި ސަރުކާރުން ހަދަނީ ދޮގު ނޫން ކަމަށާއި މިފަދަ ތުހުމަތުތަށް ނުކުރުމަށާއި އަބަދުވެސް ދިވެހި ރައްޔިތުންނަށް އިޚުލާސްތެރި ކަމާއި އެކު ތެދުބަހުން މުޚާތަބު ކުރެއްވުމަށްވެސް ރައީސް ވަނީ އިލްތިމާސް ކުރައްވާފައިއެވެ.
