ކޮވިޑް-19؛ ހޯނޑެއްދޫއިން ހަތަރު މީހަކު ފައްސި ވެއްޖެ
ގދ. ހޯނޑެއްދޫއިން ހަތަރު މީހަކު ކޮވިޑް-19 އަށް ފައްސި ވެއްޖެއެވެ.
އެނގިފައިވާ ގޮތުގައި މިހަތަރު މީހުންނަކީ ވެސް އެރަށުގައި ހޯމް ކަރަންޓީނުގައި ތިބި ހަތަރު މީހުންނެވެ. އެމީހުން ކޮވިޑަށް ފައްސިކަން އެނގިފައިވަނީ މިއަދު އެވެ.
އޮންލައިން ނޫސް "ވަގުތު" އިން ބުނެފައިވަނީ ހޯނޑެއްދޫ އިން ފައްސިވީ މީހުންގެ ތެރޭގައި އުމުރުން 18 އަހަރު ނުފުރޭ ދެ ކުއްޖަކު ވެސް ހިމެނޭ ކަމަށް އެރަށުގެ ކައުންސިލުގެ ނައިބު ރައީސް މުޙައްމަދު އަޝްރަފު ވިދާޅުވި ކަމަށެވެ.
އެޗްްޕީއޭގެ އެންގުންތައް ލައުޑު ސްޕީކަރު މެދުވެރިކޮށް ރަށުގެ ރައްޔިތުންނަށް އަންގަމުން އަންނަ ކަމަށް ވެސް އަޝްރަފު ވިދާޅުވެފައިވެއެވެ.
"ގިނަ ދުވަސްވެފައިވާ ބައްޔެއްކަމުން ގިނަ މީހުންނަށް ބައްޔަކީ ކޮންއެއްޗެއްކަން އެނގޭ. އެހެން ނަމަވެސް ބަލިން ރައްކާތެރިވުމަށް އެންމެން ސަމާލުކަން ދިނުމަށް މި ދަނީ ގޮވާލަމުން". އަޝްރަފް ވިދާޅުވިއެވެ.
ގދ. ހޯނޑެއްދޫއިން މިބައްޔަށް މިއަދު ހަތަރު މީހުން ފައްސިވެފައިވާއިރު، މީގެ ތިން ދުވަސް ކުރިން އެއަތޮޅު ތިނަދޫއިން ވެސް ވަނީ މިބަލި ފެނިފައެވެ.
އެގޮތުން "ދެރަހަ" ބޯޓުގެ މީހަކު ކޮވިޑަށް ފައްސިވުމުން އެރަށް މޮނީޓަރިންގަށް ވެސް ލެވުނެވެ. އަދި އެމީހާއާއި ކޮންޓެކްޓުވީ ބިދޭސީއަކު ވެސް ފަހުންް ވަނީ މިބައްޔަށް ފައްސިވެފައެވެ. ނަމަވެސް މިއަދު ތިނަދޫ ވަނީ މޮނީޓަރިންގެ ޙާލަތުން ނަގާ، އާއްމެ ހާލަތައް ގެނެސްފައެވެ.
