މީހުން ދިރިއުޅޭ ތަންތަނުގައި ތެޔޮ ރައްކާކޮށްގެން ގެންގުޅޭނަމަ ފިޔަވަޅު އަޅާނަން- ސިޓީ ކައުންސިލު
މީހުން ދިރިއުޅޭ ތަންތަނުގައި ތެޔޮ ރައްކާ ކޮށްގެން ގެންގުޅޭނަމަ ފިޔަވަޅު އަޅާނެ ކަމަށް މާލެ ސިޓީ ކައުންސިލުން ބުނެފިއެވެ.
2012 ވަނަ އަހަރު ޑިފެންސް މިނިސްޓްރީއިން އެކުލަވާލި "ތެލުގެ ބާވަތްތައް ގެންގުޅެ، ބޭނުންކޮށް ގުދަންކުރުމާއިބެހޭ ޤަވައިދު" ދަށުން ތެލުގެ ޚިދުމަތްދޭ އެއްވެސް ތަނަކުން މީހުން ދިރިއުޅޭ ސަރަހައްދަށް ތެޔޮ ސަޕްލައިކޮށްދިނުމަކީ މަނާ ކަމެކެވެ.
މިގަވައިދާ ހަވާލާދީ ސިޓީކައުންސިލުން ބުނެފައިވަނީ މީހުން ދިރިއުޅޭ ސަރަހައްދެއްގައި ތެޔޮ ރައްކާކޮށް ގެންގުޅުމަކީ ވެސް މަނާކަމެއްކަމަށް އެ ކައުންސިލުން ނިންމާފައި ވާކަމަށެވެ. އަދި މި އެންގުމާ ޚިލާފުވާ ފަރާތްތަކާއިމެދު ފިޔަވަޅު އަޅާނެކަމަށް ސިޓީ ކައުންސިލުން ވަނީ މިއަދު އަންގާފައެވެ.
މިއީ އަލިފާނުގެ ހާދިސާތަކުން ލިބޭ ގެއްލުން އިންތިހާއަށް ބޮޑުވެގެންދާތީ، ރައްކާތެރިކަމުގެ ގޮތުން އަޅާ ފިޔަވަޅެއް ކަމުގައި ވެސް އެކައުންސިލުން ވަނީ ބުނެފައެވެ.
މާލޭގައި މިދިޔަ އަހަރު ހިނގި ބޮޑު އަލިފާނުގެ ޙާދިސާއަކީ ގިނަ އާއިލާތަކަށް އޭގެ އަސަރުކުރި ޙާދިސާއެކެވެ. 7 ގެއެއް އަނދައި ބޮޑެތި ގެއްލުންތަކެއް ވިއިރު، ގުދަންތަކެއް ވެސްވަނީ މުޅިން އަނދާފައެވެ. މި ޙާދިސާ މިހާ ބޮޑުވެގެންދިޔައީ އެ ސަރަޙައްދުގައި ހުރި ފަސޭހައިން އަލިފާންހިފާ ޒާތުގެ ކެމިކަލްތަކެއްގައި ރޯވުމުންނެވެ. މިކަމާއި ގުޅިގެން މިދިޔަ އަހަރު ވަނީ ކެމިކަލް ގެންގުޅުމާއި ރައްކާކުރުމުގެ ގަވައިދު އެކުލަވާލައި އެގަވައިދަށް ޢަމަލުކުރަން ފަށާފައެވެ.
