ކޮވިޑް-19: ފޮނަދޫއިން މީހަކު ބައްޔަށް ފައްސި ވެއްޖެ
ލ.ފޮނަދޫއިން މީހަކު ކޮވިޑަށް ފައްސި ވެއްޖެއެވެ.
އެނގިފައިވާ ގޮތުގައި ފޮނަދޫއިން ފައްސި ވެފައިވަނީ އެރަށުގައި ހޯމް ކަރަންޓީނުގައި ހުރި މީހެކެވެ.
"ދެން" އަށް މައުލޫމާތު ދެއްވަމުން ފޮނަދޫ ކައުންސިލުގެ ރައީސް އަޙުމަދު ރިޔާޒް ވިދާޅުވީ، އެރަށުން ފައްސި ވެފައިވަނީ ހޯމް ކަރަންޓީނުގައި ހުރި ބިދޭސީއެއް ކަމަށެވެ.
"މާލެއިން ކަރަންޓީނަށް އައި ބިދޭސީއެއް އެއީ. ކަރަންޓީނުގެ މުއްދަތު ހަމަވެގެން އިއްޔެ އޭނަގެ ސާމްޕަލް ނެގީ. މިއަދު އިރުއޮއްސުނު އިރު ނަތީޖާ ލިބިގެން އެނގުނީ ކޮވިޑަށް ފައްސިކަން. އެމީހާ އަދިވެސް ހުރީ ކަރަންޓީނުގައި. ކަރަންޓީނުގައި ހުރި މީހެއް ވީމަ ރަށް މޮނީޓަރިންއަށް ނުލާނެ" ރިޔާޒް ވިދާޅުވިއެވެ.
މީގެ އިތުރުން ރިޔާޒް ވިދާޅުވީ ފައްސިވީ މީހާ ކަރަންޓީނުގައި ހުރި ގެ މިހާރު ވަނީ މޮނީޓަރިންއަށް ލާފައި ކަމަށެވެ.
ފޮނަދޫ ހެލްތު ސެންޓަރުން ބުނެފައިވަނީ މާލެއިން ލ.ފޮނަދު އައިސް ހޯމް ކަރަންޓީންގައި ހުރި ބިދޭސީއެއްގެ ސާމްޕަލް 02 ސެޕްޓެމްބަރ 2020 ގައި ނެގި ކަމަށާއި މި ސާމްޕަލްގެ ނަތީޖާ ވަނީ ފައްސި ވެފައިވާ ކަމަށެވެ. އަދި މިކަމާއި ގުޅިގެން ސިއްޙީ މަރުކަޒުގެ ފަރާތުން އަޅަންޖެހޭ ފިޔަވަޅުތައް އަޅަމުންގެންދާ ވާހަކަ ވެސް ބުނެފައިވެއެވެ.
Ads by STO
