ހިޔާ ޓަވަރުތަކުގެ މެއިންޓެނެންސް އަވަސްކުރަން އިތުރު ކުންފުނިތަކާއެކު ސޮއިކޮށްފި
ހުޅުމާލެ ދެވަނަ ފިޔަވަހީގައި ހުންނަ ހިޔާ ފްލެޓުތަކަށް ދިމާވާ އެކި މައްސަލަތައް ހައްލުކުރުމަށް، މެއިންޓެނެންސް މަސައްކަތް ކުރުމަށް ހަތަރު ކުންފުންޏަކާއިއެކު އެއްބަސްވެފައިވާކަމަށް ހައުސިންގް ޑިވެލޮޕްމެންޓް ކޯޕަރޭޝަން، އެޗްޑީސީން ބުނެފި އެވެ.
ގާތްގަނޑަކަށް 40،000 އެއްހާ މީހުންގެ އާބާދީއެއް ދިރިއުޅޭ ހިޔާ ފްލެޓުތަކުގެ މެއިންޓެނެންސް މަސައްކަތްތައް ލަސްވާކަމަށްބުނެ ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުގައި ޝަކުވާ ބޮޑުވި އެވެ. އަދި މިކަމުގެ ސަބަބުން އެތަނުގައި ދިރިއުޅޭ ރައްޔިތުންނަށް ބޮޑެތި ތަކުލީފުތަކެއް އުފުލަން ޖެހޭކަމަށް އާންމުން ބުނަމުން ދިޔަ އެވެ.
އެޗްޑީސީގެ ޖެނެރަލް މެނޭޖަރު އިސްމާއީލް އަގީލް ރޭ ވިދާޅުވީ ހިޔާ ފްލެޓް ސަރަހައްދުގެ 54 ލިފްޓް މީގެ ކުރިން މެއިންޓެއިން ކުރީ ދެ ކުންފުންޏަކުން ކަމަށެވެ. އެހެންނަމަވެސް މިހާރު ވަނީ ހަތަރު ކުންފުންޏަކުން މެއިންޓެނެންސް މަސައްކަތް ކުރަން ހަވާލުކޮށްފައިކަމަށް އަގީލް ވިދާޅުވި އެވެ.
މެއިންޓެނެންސް މަސައްކަތް ކުރާ ކުންފުނިތަކުގެ ތަފްސީލު އަގީލް ހާމައެއް ނުކުރައްވަ އެވެ. އެހެންނަމަވެސް ކުރިއަށްވުރެއް ރަނގަޅަށް މެއިންޓެނެންސް ހިދުމަތް ފޯރުކޮށްދޭނެކަމަށް އަގީލް ވަނީ ވިދާޅުވެފަ އެވެ.
ހިޔާ ފްލެޓުތަކަށް ދިމާވެފައިވާާ ލިފްޓުގެ ދަތިކަން ހައްލު ކުރުމަށް ރައީސް ޑރ. މުހައްމަދު މުއިއްޒުގެ ސަރުކާރުން ވަނީ ކޮންމެ ޓަވަރެއްގައި އިތުރު ދެ ލިފްޓު ހަރުކުރުމުގެ މަސައްކަތް ފަށައިފަ އެވެ. އެގޮތުން ހަރުކުރާ އެއް ލިފްޓު ހަދަނީ ސްޓްރެޗާ އެރުވޭ ވަރަށް ޖާގަ ބޮޑުކޮށެވެ. އަނެއް ލިފްޓު ހަދަނީ 14 މީހުންގެ ޖާގަ ލިބޭ ވަރަށް ތަނަވަސްކޮށެވެ.
މި އަހަރަށް ލަފާކޮށް ރައްޔިތުންގެ މަޖިލިހުން ފާސް ކުރި ބަޖެޓުގައި ވަނީ ހިޔާ ޓަވަރުތަކުގައި އިތުރު ލިފްޓު ހަރު ކުރަން 200 މިލިއަން ރުފިޔާ ހިމަނައިފަ އެވެ. ލިފްޓު ހަރުކުރުމުގެ މަސައްކަތް އެއް އަހަރު ތެރޭ ނިމޭނެ ކަމަށް އެޗްޑީސީއިން ލަފާ ކުރާއިރު، ރައީސް މުއިއްޒުގެ އަމާޒަކީ އެއަށް ވުރެ ކުރިން މި މަސައްކަތް ނިންމައިލުމެވެ.
