މެޑިކަލް ސްކޫލުގެ އާ އިމާރާތް އަޅައިދޭނެ ބަޔަކު ހޯދަން އިއުލާން ކޮށްފި
މޯލްޑިވްސް ނެޝަނަލް ޔުނިވަސިޓީގެ ދަށުން މިހާރު ހިންގަމުން އަންނަ މެޑިކަލް ސްކޫލުގެ އާ އިމާރާތެއް އެޅުމަށް ޝައުގުވެރިކަން ފާޅުކުރުމުގެ ފުރުސަތު ހުޅުވާލައިފި އެވެ.
މެޑިކަލް ސްކޫލު މިހާރު ހިންގަމުން އަންނަނީ ދަރުމަވަންތަ ހޮސްޕިޓާ އިމާރާތުގަ އެވެ. މީގެ ސަބަބުން ހޮސްޕިޓަލަށް ވަނީ ޖާގައިގެ ދަތިކަން ދިމާވެފަ އެވެ.
އިއްޔެ ގެޒެޓުގައި ކުރި އިއުލާނެއްގައި ބުނެފައިވަނީ މެޑިކަލް ސްކޫލުގެ އާ އިމާރާތުގެ މަސައްކަތް ކުރުމަށް ގާބިލުކަން ހުރި ރާއްޖެ އަދި ބޭރުގެ ކޮންޓްރެކްޓަރުންނަށް ޖޫން 27, ގެ ކުރިން ޝައުގުވެރިކަން ފާޅުކުރުމަށް ހުޅުވާލާ ކަމަށެވެ. މިކަމާ ގުޅޭ މައުލޫމާތު ބައްދަލުވުމެއް މެއި 27, ގައި ބާއްވާނެކަމަށްވެސް އިއުލާނުގައި ވަނީ ބުނެފަ އެވެ.
އެ އިއުލާނުގައިވާ ގޮތުން މިއީ ރާއްޖެ އާއި ދެކުނު އޭޝިއާގައި ސިއްހީ ދާއިރާއިން ތައުލީމާއި ތަމްރީނު ހޯދުމަށް އިތުރުވަމުންދާ ޑިމާންޑަށް ހިދުމަތް ދެވޭ ގޮތަށް ޓީޗިން ހޮސްޕިޓަލަކާ އެކު ތަރައްގީކުރާ މެޑިކަލް ސްކޫލެކެވެ. މި ޕްރޮޖެކްޓުގެ ދަށުން, ކިޔަވައިދޭ ތަންތަނާއި, ސެމިނާ ރޫމްތަކާއި, އޮޑިޓޯރިއަމަކާއި, ލެބޯޓަރީ އަދި ސްކޫލަށް ބޭނުންވާ ހުރިހާ ވަސީލަތެއް ގާއިމުކުރާނެ އެވެ.
ކޮންމެ އިންޓޭކެއްގައި 100 ދަރިވަރުންނަށް ފުރުސަތު ދެވޭނެ ކަމަށާއި އަދި ފުލް ކެޕޭސިޓީގައި 500 ދަރިވަރުންނަށް އެއްފަހަރާ ކިޔަވައިދެވޭނެ ފެންވަރަށް މި ސްކޫލް ތަރައްގީކުރާނެ އެވެ. މި ސްކޫލާއި ޓީޗިން ހޮސްޕިޓަލުގެ ޑިޒައިންކޮށް ކުރަހާނީ އެމްއެންޔޫއިންްނެވެ.
މެޑިކަލް ސްކޫލު އަޅަން ނިންމާފައިވަނީ ހުޅުމާލޭ ދެވަނަ ފިޔަވަހީގަ އެވެ. އެހެންނަމަވެސް އަޅާނެ ވަކި ބިމެއް އަދި ސަރުކާރުން އިއުލާނެއް ނުކުރެ އެވެ. ސަރުކާރުން ބުނީ މެޑިކަލް ސްކޫލު އަޅަން 61،000 އަކަފޫޓަށްވުރެއް ބޮޑު ކޮށްޓެއް ހާއްސަކުރާނެ އެވެ.
ދަރުމަވަންތަ ހޮސްޕިޓަލުގައި މެޑިކަލް ސްކޫލަށް ހާއްސަކޮށްފައިވާ ފަންގިފިލާ ހޮސްޕިޓަލުގެ ބޭނުމަށް ނަގައި، ބެޑް ކެޕޭސިޓީ އިތުރުކުރަން ސަރުކާރުން މީގެ ކުރިން ނިންމި އެވެ. އެހެންނަމަވެސް ޔުނިވަސިޓީ ދަރިވަރުންގެ ކަންބޮޑުވުންތަކާއިއެކު ރައީސް މުއިއްޒު ވަނީ މެޑިކަލް ސްކޫލުގެ އާ އިމާރާތް ނިމެންދެން ދަރިވަރުންނަށް ދަރުމަވަންތަ ހޮސްޕިޓަލުގައި ތައުލީމު ހާސިލް ކުރެވޭގޮތަށް އިންތިޒާމުތައް ހަމަޖައްސައިދީފަ އެވެ.
Ads by STO
