ކޮވިޑް-19: އަލްޙަމްދުލިﷲ،އިތުރު 159 މީހުން ބަލިން ފަސޭހަ ވެއްޖެ
ކޮވިޑް-19 އަށް ފައްސީ މީހުންގެ ތެރެއިން އިތުރު 159 މީހަކު މިބަލިން ފަސޭހަ ވެއްޖެއެވެ.
އިއްޔެގެ އިރުއޮއްސި 18:00 އިން ފެށިގެން މިއަދުގެ އިރުއޮއްސި 18:00 އާއި ހަމައަށް ރާއްޖެއިން ކޮވިޑަށް ފައްސި ވެފައިވަނީ 80 މީހުންނެވެ. އެއީ 60 ދިވެހީންނާއި 20 ބިދޭސީންނެވެ.
މާލެ ސަރަޙައްދުން ފައްސިވީ 77 މީހެކެވެ. އަދި އަތޮޅު ތެރެއިން ތިން މީހަކު ފައްސި ވެފައިވެއެވެ.
މިއާއެކު ރާއްޖެއިން މިބައްޔަށް ފައްސިވީ ޖުމްލަ މީހުންގެ އަދަދު މިހާރު ވަނީ 8،361 އަށް އަރާފައެވެ.
އައިސޮލޭޝަން ފެސިލިޓީ ތަކުގައި 1،253 މީހުން މިހާރު ތިބިއިރު ބައްޔަށް ފައްސިވީ 162 މީހަކަށް ހޮސްޕިޓަލުތަކުގައި ދަނީ ފަރުވާ ދެމުންނެވެ.
މިހާތަނަށް ރާއްޖެއިން މިބަލިން 5،642 މީހުން ފަސޭހަ ވެފައިވާއިރު 29 މީހަކު މިބަލީގައި ވަނީ ނިޔާވެފައެވެ.
ރާއްޖެއިން މިބައްޔަށް ފައްސިވީ މީހުންގެ އަދަދު މިއަދު 80 އަށް އެރި ނަމަވެސް، ރާއްޖޭގައި ކޮވިޑަށް ފައްސިވެފައިވާ މީހުންގެ އަދަދު މިފަހަކަށް އައިސް ކޮންމެ ދުވަހަކު ވެސް ހުންނަނީ 100 އަށްވުރެ މަތީގައެވެ.
ބަލި ފެތުރުން ކޮންޓްރޯލް ކުރުމަށް އެޗްޕީއޭ އިން އަންނަނީ ކޮންމެ ދުވަހަކު ވެސް އެތައް އިރުޝާދުތަކެއް ދެއްވަމުންނެވެ. އެގޮތުން، ކޮންމެހެން ދާން ޖެހިގެން ނޫނީ ގެއިން ބޭރަށް ނުނިކުތުމަށާއި، އިޖުތިމާއީ ގައިދުރުކަން ބެހެއްޓުމަށް އަދި ބޭރުގައި އުޅޭއިރު މާސްކު އަޅައިގެން އުޅުމަށް ވެސް އެޗްޕީއޭ އިން އަންނަނީ ރައްޔިތުންނަށް އިލްތިމާސް ކުރައްވަމުންނެވެ.
