ފުވައްމުލަކުގައި ޑައިވިނަށް ދިޔަ މީހަކު މަރުވެއްޖެ
ފުވައްމުލައް ސިޓީގައި ޑައިވިނަށް ގޮސް އުޅުނު ފަތުރުވެރިޔަކު މަރުވެއްޖެ އެވެ.
މައުލޫމާތު ލިބޭ ގޮތުގައި މަރުވެފައިވަނީ ޗައިނާއަސް ނިސްބަތްވާ ފަތުރުވެރިއެކެވެ. އެމީހާ ޑައިވިނަށް ގޮސްފައި މައްޗަށް އެރި ފަހުން ވަރަށް ބޮޑަށް ހާލު ދެރަވެގެން ހޮސްޕިޓަލަށް ގެންގޮސް ފަރުވާ ދިނެވެ.
މިމައްސަލައިގައި ފުލުހުން ބުނީ ޓައިގާ ޝާކް ޕޮއިންޓަށް ޑައިވިނަށް ދިޔަ ފަތުރުވެރިއަކު ޑައިވިން ނިންމައި ދޯންޏަށް އެރި ފަހުން ހާލު ދެރަވެގެން ހޮސްޕިޓަލަށް ގެންގޮސް ފަރުވާ ދިންކަމަށެވެ. އަދި އެކަމުގެ މައުލޫމާތު ފުލުހުންނަށް ލިބުނީ މިއަދު ހެނދުނު 11:26 ހާއިރު ކަމަށްވެސް ފުލުހުން ބުންޏެވެ.
ފުލުހުން ބުނާ ގޮތުގައި ފަތުރުވެރިޔާ ހޮސްޕިޓަލަށް ގެންދިޔައިރުވެސް މަރުވެފައިވާ ކަމަށް ހޮސްޕިޓަލުން ހަވާލާ ދެއެވެ.
މަރުވި ޗައިނާ ފަތުރުވެރިޔާގެ އުމުރަކީ 70 އަހަރެވެ.
މިހާދިސާއާއި ގުޅިގެން އިތުރަށް ބަލަންޖެހޭ ކަންކަން ފުލުހުން ދަނީ ބަލަމުންނެވެ.
