ސްޕޮޓްލައިޓް: މިޒޫގެ ހިތުލޯބި އަދިވެސް ރޭޑިއޯއަށް

މިޒޫއޭ ބުނުމުން ނޭނގޭ މީހަކު މިހާރު ރާއްޖޭގައި މަދުވާނެ އެވެ. ވޭތުވެދިޔަ ދިހަވަރަކަށް އަހަރުގެ ތެރޭގައި އެތައް ބައެއްގެ ލޯތްބާއި ތަރުހީބު މިޒޫ ހޯދީ ރޭޑިއޯ އަދި ޓީވީ ޕްރޮގުރާމުތައް މެދުވެރިކޮށެވެ.

Ads by MWSC

މި ކިޔައިދެނީ ދިވެހި އެފްއެމް އަދި ޓެލެވިޝަން މޯލްޑިވްސްއިން އެންމެންގެ މަގުބޫލުކަން ހޯދި މިޒްނާ އަހުމަދުގެ ވާހަކަ އެވެ.

ދާއިރާއަށް ވަދެވުނީ ހީވެސް ނުކުރާ ގޮތަކަށް

މިޒޫ އެންމެ ފުރަތަމަ މަސައްކަތް ކުރަން ފެށީ ދިވެހިރާއްޖޭގެ އަޑުގެ މުވައްޒަފެއްގެ ގޮތުގައި އެތަނުގެ ލައިބްރަރީ ބަލަހައްޓާށެވެ. އެތަނުގައި އޭރު މަސައްކަތް ކުރަމުން ދިޔަ ޕްރޮޑިއުސަރުންނާއި ޕްރެޒެންޓަރުން ގެންގުޅޭ ގަނޑުތައް މިޒޫއަށް ލިބުމުން އެ ބަލައި, ކިޔައި ހަދަ އެވެ. އަދި ޕްރޮގުރާމުތައް ލައިބްރަރީގައި ރައްކާ ކުރަން ގެނައުމުން އެ އަޑުއަހާ ހަދަ އެވެ.

“އޭރުގަ ހިތަކަށް ނާރަ ޝައުގުވެރިވެޔެކޭ. އެކަމަކު އެހެން އުފައްދާފަ ހުންނަ އެއްޗެހި އަޑުއަހަން ފެށީމަ ހިތަށް އެރީ މިކަހަލަ މަސައްކަތެއް އަޅެ ވަރަށް ޓްރައި ކޮށްލާ ހިތްވެޔޭ”

މިޒޫ ލައިބްރަރީގައި މަސައްކަތް ކުރާތާ އަހަރެއްހާ ދުވަސް ވާން ކައިރިވެފައިވަނިކޮށް ދިވެހިރާއްޖޭގެ އަޑަށް ޕްރޮޑިއުސަރުން ވައްދަން އިއުލާން ކުރި އެވެ. އޭރު އެތަނުގެ މުވައްޒަުން ބުނާ ގޮތުން އެއް ޑިޕާޓްމެންޓުން އަނެއް ޑިޕާޓްމެންޓަށް މުވައްޒަފުން ބަދަލު ކުރުމަކީ ތަނުގެ އުސޫލެއް ނޫނެވެ. އެއާއެކުވެސް މިޒޫ ބޭނުންވީ ޕްރޮޑިއުސަރެއްގެ ވަޒީފާއަށް ފޯމު ހުށަހަޅާށެވެ.

ދެން ޖެހުނީ ކުރު ކޯހެއް ފުރިހަމަ ކުރާށެވެ. އެ ކޯހަށްފަހު ވަޒީފާއަށް ނަގާނީތޯ ނުވަތަ ނޫންތޯ ނިންމަން މަސައްކަތް ކުރުމުގެ ފުރުސަތު މިޒޫއަށް އަޑުން ދިނެވެ. ދުވަސްކޮޅަކަށްފަހު އަޑުން ނިންމީ މުނިފޫހިފިލުވުމުގެ ޕްރޮގުރާމުތައް ހުށަހަޅަން މިޒޫ ކަމުދާ ކަމަށެވެ. ފުރަތަމަ ދުވަސްކޮޅު މިޒޫ ހުރިހާ ޕްރޮގުރާމެއްވެސް ހުށަހެޅީ ކުރީބައިގައި ލިޔެގެން އެ ބަލައިގެންނެވެ. އޭރު ލިޔުމަކަށް ނުބަލައި ހުށަހަޅައިދޭން މިޒޫ ފަސްޖެހުނެވެ.

އަހަރުތަކެއް ފަހުން މިއަދު މިޒޫއަކީ އަޑާއި ދިވެހި އެފްއެމްގައިވެސް މަސައްކަތް ކުރާ އެންމެ ދޫ ފަރިތަ އެއް ޕްރެޒެންޓަރެވެ. އަދި އެންމެ ކުޅަދާނަ އެއް ޕްރޮޑިއުސަރެވެ. ދިވެހި އެފްއެމްގައި މަސައްކަތް ކުރަމުން ދަނިކޮށް ޓީވީއެމްގެ ޕްރޮގުރާމްތައްވެސް ހުށަހަޅަން ފުރުސަތު ލިބުނެވެ. މިއަދު މިޒޫއަކީ ޓީވީއެމްގެ އެންމެ ބޮޑެތި ޕްރޮގުރާމުތައް ޕްރެޒެންޓު ކުރާ އޭ ގްރޭޑުގެ ހޮސްޓެކެވެ. މީގެ އިތުރުން ސްޓޭޖު ޝޯތަކާއި ރަސްމީ އެތަކެއް ހަފްލާތަކެއްވެސް އޭނާ ވަނީ ހޮސްޓުކޮށްދީފަ އެވެ.

މިޒޫއަކީ ރަސްމީ ގިނަ އިވެންޓުތަކެއްވެސް ޕްރެޒެންޓު ކޮށްދެމުންދާ ފަރާތެއް

ހިތު ލޯބި ރޭޑިއޯއަށް

ޓީވީއާއި ރޭޑިއޯގައި މަސައްކަތް ކުރާ މިޒޫ އަދިވެސް ހިތު ލޯބި އޮތީ ރޭޑިއޯއަށެވެ. މިޒޫ ގަބޫލުކުރާ ގޮތުގައި އޭނާގެ “އަސްލު ސެލްފް” ދައްކަން ފުރުސަތު ލިބެނީ ރޭޑިއޯގަ އެވެ. އެހެންނަމަވެސް ޓީވީ ޕްރޮގުރާމްތަކަށްވެސް ވަރަށް ބޮޑު ޝައުގުވެރިކަމެއް އެބަ އޮތެވެ.

މިޒޫއަކީ މިޒާޖުގައިވެސް މީހުންނާ ވަރަށް ގުޅޭ މީހެކެވެ. އެހެންވެ މިޒޫ ބުނި ގޮތުގައި އާންމުންނަށް ގުޅައި, ވާހަކަ ދައްކައިގެން ކުރިއަށް ގެންދާ ޕްރޮގުރާމުތަކަށް ހާއްސަ ކަމެއް ދެވެ އެވެ. ރޭޑިއޯ ޕްރޮގުރާމުތަކަކީ އާންމުކޮށް އެހުންތެރިންނަށް ގުޅައިގެން ވާހަކަ ދައްކާ ޕްރޮގުރާމްތަކެއް ކަމުން މިއީ އޭނާގެ ދާއިރާކަމަަށް އޭނާ ދެކެ އެވެ.

ފަހުރުވެރިވާ މަސައްކަތްތައް ގިނަ

މިހާތަނަށް އައިއިރު މިޒޫ ވަނީ އެތައް ޕްރޮގުރާމްތަކެއް ޕްރޮޑިއުސްކޮށް އެތައް ޕްރޮގުރާމްތަކާއި ޝޯތަކެއް ޕްރެޒެންޓުވެސް ކޮށްދީފަ އެވެ. އެންމެ ފަހުރުވެރިވާ މަސައްކަތަކީ ކޮބައިތޯ އެހުމުން ޖަވާބުދޭން މިޒޫއަށް އުނދަގޫވި އެވެ. އެހެންވެ އޭނާ ޖަވާބު ދޭން ފެށީ ދިވެހި އެފްއެމް އުފެދުނު ފަހުން އެތަނުގައި ކުރި ގިނަ މަސައްކަތްތައް ވަރަށް ހިތްހަމަޖެހޭކަމަށް ބުނަމުންނެވެ.

“ބޮޑަށް ހިތްހަމަޖެހޭ ސަބަބަކީ އާންމުންނަށް އަޑުއިވިގެން ނޯޓިސްކުރެވުނީމަ އޭތި ވަރަށް އުފާވޭ އަސްލު”

މިޒޫގެ އަޑު އެހުންތެރިންނަށް މިހާރު ބީރައްޓެއްސެއް ނޫނެވެ. އެއީ މިޒޫއަށްވެސް ލިބޭ ވަރަށް ބޮޑު އުފާވެރިކަމެކެވެ. މިއާއެކުވެސް ފަހުރުވެރިވާ ބައެއް މަސައްކަތްތައް މިޒޫ ލިސްޓުކޮށްލި އެވެ. ހުށަހަޅައިދޭން ފުރުސަތު ލިބުމުން އެންމެ ބޮޑަށް އޭނާ ފާހަގަކޮށްލަން ބޭނުންވަނީ ދިވެހިރާއްޖޭގެ އަޑުގެ ބެސްޓް ރޭޑިއޯ ޕްރެޒެންޓަރ އަދި ދިވެހި އެފްއެމްގެ ކަރޯކޭ ޗެލެންޖެވެ.

މިޒޫ ބުނާ ގޮތުން އޭނާ އަދިވެސް އެންމެ ހިތްހަމަ ޖެހެނީ ރޭޑިއޯ ޕްރޮގުރާމުތަކާއިމެދު

އެންމެ ކަމުދާ ރޭޑިއޯ އަދި ޓީވީ ޕްރެޒެންޓަރުން

“ހާދަ އުނދަގޫ ސުވާލެކޭ ތި ކުރީ. ހޫނުފެނަށް ވެއްޓޭ ކަހަލަ ސުވާލެއް ތީ’

އެންމެ މޮޅު ރޭޑިއޯ ޕްރެޒެންޓަރުންގެ ނަންތައް ކިޔަން އެދުމުން މިޒޫއަށް އުނދަގޫވި އެވެ. އޭނާ ބުނި ގޮތުގައި އަޑުގައި އަދި އެފްއެމްގައި މަސައްކަތް ކުރާ ހުރިހާ ޕްރެޒެންޓަރުންވެސް ވަރަށް މޮޅެވެ. އެކަމަކު އޭނާއަށް ކަމުދާ ފަސް މީހެއްގެ ނަން ފާހަގަކޮށްލި އެވެ. އަލީ ރާޒީ, ރަމްލާ, އާޝިދާ, ހައްސާންގެ އިތުރުން ފަހީދާ ވަރަށް މޮޅުކަން މިޒޫ ފާހަގަކުރެ އެވެ.

ޓީވީ ޕްރެޒެންޓަރުންގެ ތެރެއިން ގިނަ ޕްރެޒެންޓަރުންތަކަކާއިއެކު މިޒޫ މަސައްކަތް ކޮށްފި އެވެ. އެހެންވެ އޭގެ ތެރެއިން މަސައްކަތްކޮށްލަން އެންމެ ފަސޭހަ ތިން މީހެއްގެ ނަން ބުނަން މިޒޫ ކައިރިން އެދުނީމެވެ. އޭނާ މިހާރު އެންމެ ގިނަ ޕްރޮގުރާމުތައް ހުށަހެޅީ ރިޝް އައްބާސްއާއިއެކު އެވެ. އެހެންވެ އެންމެ ފުރަތަމަ މިޒޫ ފާހަގަކުރީ ރިޝްގެ ނަމެވެ. ދެން މޫސާ ވަސީމް އާއި ޒިޔާގެ ނަން ފާހަގަކުރި އެވެ. މިޒޫ ބުނާ ގޮތުން އެންމެ މަސައްކަތް ކުރާހިތްވާ އެކަކީ މޫސާ ވަސީމް އެވެ.

މަސައްކަތް ކޮށްފިނަމަ ކުރިއަށް ދެވޭނެ

އެއްވެސް ދާއިރާއަކީ މަސައްކަތެއް ނުކޮށް ކުރިއެރުން ލިބޭނެ ދާއިރާއެއް ނޫނެވެ. މިޒޫ ބުނީ ރޭޑިއޯ އަދި ޓީވީ ޕްރެޒެންޓިންގެ ދާއިރާއަކީވެސް މިކަހަލަ ދެ ދާއިރާ ކަމަށެވެ. މިޒޫއަކީ ވަރަށް މޮޅު މީހެކޭ އަދިވެސް އަމިއްލައަށް ގަބޫލެއް ނުކުރެ އެވެ. އޭނާ ބުނީ ކޮންމެ ދުވަހަކީ އަދި ކޮންމެ ޕްރޮގުރާމަކީވެސް އާ އެއްޗެއް ދަސްކުރަން ލިބޭ ފުރުސަތެކެވެ. ކޮންމެ ދުވަހަކުވެސް އާ މައުލޫމާތުތަކެއް ލިބެ އެވެ.

މިޒޫ ބުނާ ގޮތުގައި ހިތްވަރު ކޮށްފިނަމަ މި ދާއިރާއިންވެސް ކުރިއަށް ދެވޭނެ އެވެ. ރޭޑިއޯ ޕްރޮގުރާމެއް ހުށަހެޅުމާއި, މީހުންނަށް ގުޅައިގެން ވާހަކަ ދެއްކުމާއި, މީހަކު ކުރިމަތީގައި ބައިންދައިގެން ސުވާލު ކުރުމާއި ޓީވީ ޕްރޮގުރާމުތަކާއި އަދި ސްޓޭޖު ޝޯތަކަކީވެސް މުޅިން ތަފާތު އުކުޅުތަކެއް ކަމަށް މިޒޫ ފާހަގަކުރެ އެވެ. އެހެންވެ އަބަދުވެސް މަސައްކަތް ކުރަންވީ އިތުރަށް ކުރިއަރާށެވެ.

އެހެންނަމަވެސް ރާއްޖޭގައި ކޮންމެ މަސައްކަތެކޭވެސް އެއްގޮތަށް ޕްރެޒެންޓިންގެ ދާއިރާއަކީވެސް ހުއްޓޭ ކަމެކެވެ. ވަކި ހިސާބަކަށް ދެވުމުން ދެން އިތުރަށް ކުރިއަށް ދާނެ މަގެއް ނޯވެ އެވެ. ރާއްޖޭގައި އުފެދުނު ވަރަށް މޮޅެތި ޕްރެޒެންޓަރުންވެސް ވަކި ހިސާބަކުން ގެއްލެނީ އެވެ. ނޫނީ އެ ތިބި ގޮތުގައި ތިބެނީ އެވެ. މިޒޫ ބުނީ މި ދާއިރާގައި ކިތަންމެ ގިނަ ދުވަހެއް ވިޔަސް ވަރަށް ކުރިއަށް ދެވިއްޖެއެކޭ އޭނާ އަމިއްލައަކަށް ދުވަހަކުވެސް ހިތަށް ނާރާ ކަމަށެވެ.

މިޒޫ ބުނީ މަސައްކަތް ކޮށްފިނަމަ ޕްރެޒެންޓިންގެ ދާއިރާއިން ކުރިއަށް ދެވިދާނެ ކަމަށް

ރޭޑިއޯއަށް ޑިމާންޑު ކުޑަވެއްޖެ އެކަމަކު އަދިވެސް މީހުން އަޑުއަހާ

ޓެކްނޮލޮޖީއަށް އައި ޒަމާނީ ބަދަލުތަކާއެކު ރޭޑިއޯގެ ޒަމާން ގޮސްފި އެވެ. ޓީވީގެ ޒަމާންވެސް މިހާރު ދަނީ އެވެ. މިހާރު މިއީ ސޯޝަލް މީޑިއާ އެޕްލިކޭޝަންތަކާއި ސްޓްރީމިންގް ޕްލެޓްފޯމްތަކުގެ ޒަމާނެ އެވެ. މިޒޫ ބުނީ މިވޭތުވެދިޔަ އަހަރުތަކުގައި ރޭޑިއޯ ޝޯތަކަށް ގުޅާ އެހުންތެރިން މަދުވެއްޖެ ކަމަށެވެ. އެހެންނަމަވެސް އަދިވެސް ކޮންމެވެސް ބަޔަކު ރޭޑިއޯއަށް ޝައުގުވެރިކަން އެބަހުއްޓެވެ.

އޭގެ އެންމެ ބޮޑު ހެއްކަކީ ރޭޑިއޯގެ އަހަރީ ދުވަހު އެއްވެސް ކޯލާއެއް ރިޕީޓު ނުކޮށް އޮންއެއާ ކުރިއަށް ގެންދެވޭކަމެވެ. މިޒޫ ބުނީ އަހަރީ ދުވަސް ނިމޭއިރު އެއް އެހުންތެރިޔަކު ދެފަހަރަށް ބައިވެރިނުކޮށް ކުރިއަށް ގެންދެވޭ ކަމަށެވެ. އަދި މާލެއާއި އަތޮޅުތެރޭގެ އެހުންތެރިން ތަފާތެއް ނެތްކަންވެސް އޭނާ ފާހަގަކުރެ އެވެ. މިދިޔަ ރަމަޟާން މަހު ޕްރޮގުރާމުތަކުގައި ބައިވެރިވާ ގިނައިން ގުޅަނީވެސް މާލޭގައި ދިރިއުޅޭ ރައްޔިތުންނެވެ.