އިންޑިއާގައި ލޮކްޑައުން އާ ހިލާފްވާ މީހުން ގެޔަށް ވައްދަނީ ދަގަނޑު ބުރީގެ ބާރުން
1.3 ބިލިއަން މީހުންގެ އާބާދީ އޮންނަ އިންޑިއާ 21 ދުވަހަށް ލޮކްޑައުން ކުރީ މިހާރު ދުނިޔޭގެ އެކި ގައުމުތަކުގައި ހަލުވިކަމާއިއެކު ފެތުރެމުން އަންނަ ކޯވިޑް 19 އެގައުމުގައި ފެތުރުން ކޮންޓްރޯލް ކުރުމަށެވެ. އިއްޔެ މުޅި އިންޑިއާ 21 ދުވަހަށް ލޮކްޑައުން ކުރުމަށްފަހު، ސަރުކާރުގެ އެންގުމާއި ހިލާފަށް ބޭރަށް ނިކުމެ އުޅޭ މީހުން ގެޔަށް ވެއްދުމަށް އިންޑިއާއިން ބޭނުން ކުރަމުން ދިޔައީ ވަރަށް ހަރުކަށި އުކުޅުތަކެކެވެ.
ނިއުދިއްލީ އަދި އިންޑިއާގެ އެހެން ސިޓީތަކުގައި މީހުން މަގުމައްޗަށް ނިކުތުމުން އެމީހުން ގެޔަށް ވެއްދުމަށް އެގައުމުގެ ފުލުހުން ބޭނުންކުރީ ދަގަނޑު ބުރިއެވެ. ބޭރުގައި އުޅޭ މީހުން ގައިގައި ދަގަނޑު ބުރިން ތެޅުމަށްފަހު އެމީހުން ގެޔަށް ވައްދައެވެ.
އިންޑިއާ ލޮކްޑައުން ކުރުމާއި ގުޅިގެން އާއްމުން މަގުތަކަށް ނިކުމެ އުޅޭތޯ ބެލުމަށް ފާރުލުމުގެ މަސައްކަތް ކުލަ ހެދުން އަޅައިގެން ވެސް ފުލުހުން ކުރިއެވެ. ކުލަ ހެދުމުގައި ތިބި ފުލުހުން މަގުތަކުގައި އުޅުނު އާއްމުން ގެތަކަށް ވެއްދީ ލަކުޑި ދަަނޑިބުރިތަކުން ތެޅުމަށްފަހުގައެވެ.
ކޮރޯނާ ވައިރަސް ކޮންޓްރޯލް ކުރުން ހުއްޓުވުމަށްޓަކައި އިންޑިއާއިން ހަރުދަނާ ފިޔަވަޅުތަކެއް ނާޅައިފިނަމަ، 500 މިލިއަން މީހުންނަށް އެ ބަލި ޖެހި 1 މިލިއަނަށް ވުރެ ގިނަ މީހުން މަރުވެދާނެ ކަމަށް ތަޖްރިބާ ކާރުން ވަނީ ލަފާކޮށްފައެވެ.
އިންޑިއާގައި މިހާތަނަށް ވަނީ ކޯވިޑް 19 އަށް ޕޮޒިޓިވް 512 މީހުން ފެނިފައެވެ. މިހާތަނަށް މުޅި ދުނިޔެއިން މި ބަލި ޖެހުނު މީހުންގެ އަދަދު ވަނީ 4 ލައްކައަށް އަރާފައެވެ.
