ކޯވިޑް19: ރާނީ ވެސް ސެލްފް އައިސޮލޭޝަންގައި
އިނގެރޭސީންގެ ޕްރިންސް ، ޗާލްސްއަށް ކޯވިޑް 19 ޖެހުނު ހަބަރު ވެގެން ދިޔައީ އެގައުމުގެ އެތައް ބައެއްގެ ހިތުގެ ވިންދު އަވަސްކޮށްލި ކަމަކަށެވެ. އެހިސާބުން ދެން އެންމެން ބަލަން ބޭނުންވީ ޝާހީ އާއިލާގެ ބާކީ ތިބި މެމްބަރުންގެ ހާލެވެ. ޕްރިންސް ޗާލްސްގެ އިތުރުން އޭނާގެ އަނބިމީހާ ކެމީލާ ވެސް ވަނީ ކޯވިޑް 19 އަށް ޕޮޒިޓިވް ތޯ ބެލުމަށް ޓެސްޓް ކޮށްފައެވެ. ނަމަވެސް އޭނާ ނެގެޓިވް އެވެ.
ބޭރުގެ ބައެއް ރިޕޯޓްތަކުން ބުނާ ގޮތުގައި ޕްރިންސް ޗާލްސް ވަނީ ޝާހީ އާއިލާގެ ރާނީ ނުވަތަ އޭނާގެ މަންމަ އާއިވެސް ޑައިރެކްޓް ކޮންޓެކްޓް ވެފައެވެ. މީގެ އިތުރުން ޝާހީ އާއިލާގެ އެހެން މެމްބަރުންނާއި ވެސް ބައްދަލުވެފައެވެ.
ޝާހީ އާއިލާގެ ރާނީ މިވަގުތު ހުރީ ސެލްފް އައިސޮލޭޝަންގައެވެ. ބަކިންގްހަމް ޕެލެސްގެ ތަރުޖަމާނު ބުނީ ރާނީގެ ހާލުކޮޅު ރަނގަޅު ކަމަށެވެ. މީގެ އިތުރުން ރާނީ ދަނީ ޑޮކްޓަރުންގެ އިރުޝާދުތަކަށް ބޯލަނބަމުން ކަމަށްވެސް ތަރުޖަމާނު ވިދާޅުވިއެވެ.
ޕްރިންސް ޗާލްސް އަށް ކޮރޯނާ ވައިރަސް ޖެހުނީ ކޮންތާކުން ކަން ވަކިކުރުމަކީ ވަރަށް އުނދަގޫ ކަމެއް ކަމަށް ޝާހީ އާއިލާއިން ވަނީ ބުނެފައެވެ ސަބަބަކީ ޗާލްސް ވަނީ ވަރަށް ގިނަ އާއްމުންނާއި ބައްދަލުވެފައެވެ.
Ads by STO
