ޒަކާތު ހައުސްއިން މެލޭޝިއާގެ ޔުނިވާސިޓީއަކާ އެކު އެއްބަސްވުމެއް
ދިވެހިރާއްޖޭގެ ޒަކާތު ހައުސްއަށް ފަންނީ އެހީތެރިކަން ހޯދުމާއި މުވައްޒަފުން ތަމްރީނު ކުރުމާ ގުޅޭ އެއްބަސްވުމެއްގައި ޒަކާތު ހައުސްއިން ސޮއިކޮށްފި އެވެ.
ދިވެހިރާއްޖޭގެ ޒަކާތު ހައުސް އާއި އިންސިފް ޔުނިވާސިޓީ އާ ދެމެދު މި އެއްބަސްވުމެއްގައި ސޮއިކޮށްފައި ވަނީ އެ ހައުސްގެ ވަފުދަކުން މެލޭޝިއާއަށް ކުރަމުންދާ ދަތުރުގެ ތެރެއިންނެވެ. މި ދަތުރަކީ މެލޭޝިޔާގެ އިސްލާމީ ކަންތައްތަކާބެހޭ އިދާރާގެ ވަޒީރު ޕްރޮފެސަ ޑރ. މުޙައްމަދު ނައީމް މުހްތާރުގެ ދައުވަތަކަށް، އެ އިދާރާގެ މެހެމާންދާރީގައި ކުރާ ދަތުރެކެވެ.
އެއްބަސްވުމުގައި ރާއްޖޭގެ ޒަކާތު ހައުސްގެ ފަރާތުން ސޮއިކުރެއްވީ އެ ހައުސްގެ ޑިރެކްޓަ ޖެނެރަލް އުސްތާޛު އިއްޒައްދީން ޢަދްނާނެވެ. މެލޭޝިޔާގެ އިންސިފް ޔުނިވާސިޓީގެ ފަރާތުން ސޮއިކުރައްވާފައި ވަނީ ޕްރޮފެސަ ޑރ. އައިޝަތު މުނީޒާ އެވެ.
މި އެއްބަސްވުމަކީ ރާއްޖޭގެ ޒަކާތު ހައުސްއަށް ފަންނީ އެހީތެރިކަން ހޯދުމާއި މުވައްޒަފުން ތަމްރީނު ކުރުމާ އަދި އިސްްލާމީ އިގުތިސޯދު ކުރިއެރުވުމަށް ދެ ފަރާތުގެ ދެމެދު ވެވުނު އެއްބަސްވުމެކެވެ.
ޒަކާތު ހައުސްގެ ވަފުދުން ކުރަމުންދާ ދަތުރުގެ ތެރެއިން މެލޭޝިޔާގެ އިސްލާމީ ކަންތައްތަކާ ބެހޭ ވަޒީރު ވަނީ ރާއްޖޭގެ ޒަކާތު ހައުސްގެ ޑިރެކްޓަ ޖެނެރަލް އާ ބައްދަލުކުރައްވާފަ އެވެ. އެ ބައްދަލުކުރެއްވުމުގައި އެމަނިކުފާނު ވަނީ ރާއްޖޭގެ ޒަކާތު ހައުސް ތަރައްގީ ކުރުމަށް ބޭނުންވާ ފަންނީ އެހީތެރިކަމުގެ އިތުރުން އެ ހައުސްގެ މުވައްޒަފުން ތަމްރީނު ކުރުމަށް އެހީތެރިވެ ދެއްވާނެކަމުގެ ޔަގީންކަން ދީފަ އެވެ.
ދަތުރުގައި ރާއްޖޭގެ ޒަކާތު ހައުސްގެ ވަފުދުން ވަނީ މެލޭޝިޔާގެ ޒަކާތު އޮފީސްތަކަށް ޒިޔާރަތްކޮށް ތަމްރީނު ހޯދާފަ އެވެ. މެލޭޝިޔާއަކީ ޒަކާތުގެ އިދާރީ އެންމެ ހަރުދަނާ ނިޒާމު އޮންނަ އިސްލާމީ އެއް ގައުމެވެ.
ދިވެހިރާއްޖޭގައި ޒަކާތަށް ހާއްސަ އިދާރާއެއް ގާއިމުކޮށް، ޒަކާތު ހައުސް އިފުތިތާހު ކޮށްފައި ވަނީ މިދިޔަ ޑިސެމްބަރު މަހުގެ 18 ވަނަ ދުވަހު އެވެ. ޒަކާތު ހައުސް އުފެދުމާ އެކު، ޒަކާތަށް އާންމުން ހޭލުންތެރި ކުރުމަށާއި ޒަކާތުގެ ކަންކަން ހަރުދަނާކޮށް ކުރިއަށް ގެންދިއުމަށް އެ ހައުސްއިން ގިނަ މަސައްކަތްތަކެއް ދަނީ ކުރަމުންނެވެ.
