ފައިނޭންޝަލް ސާވިސަސް އޮތޯރިޓީއަށް ސީއީއޯއަކު ހޯދަނީ
އިންޓަނޭޝަނަލް ފައިނޭންޝަލް ސާވިސަސް އޮތޯރިޓީ (މިފްސާ) އަށް ޗީފް އެގްޒެކެޓިވް އޮފިސަ (ސީއީއޯ) އެއް ހޯދުމަށް އިއުލާނުކޮށްފި އެވެ.
ބައިނަލްއަގުވާމީ މާލީ ހިދުމަތްތައް ފުޅާކުރަން ރައީސް ޑރ. މުހައްމަދު މުއިއްޒު މިފްސާ އުފައްދަވާފައި ވަނީ މިދިޔަ ޖެނުއަރީ މަހުގެ 21 ވަަނަ ދުވަހު އެވެ.
އެ އޮތޯރިޓީ އުފެއްދުމުގެ މަގުސަދަކީ ރާއްޖޭގެ ސްޕެޝަލް އިކޮނޮމިކް ޒޯން ގާނޫނުގައި ބުނެފައިވާ އޮފްޝޯ އަދި އޮންޝޯ ފައިނޭންސިން ހިދުމަތްތަކާއި އޮފްޝޯ އަދި އޮންޝޯ ޑިވެލޮޕްމަންޓް ބޭންކިން ހިދުމަތް ގާއިމުކުުރުން ހިމެނެ އެވެ. ފައިނޭންސް އޮތޯރިޓީގެ ޗެއާޕާސަނަކަށް ހަމަޖައްސަވާފައި ކުރީގެ ނައިބު ރައީސް އަބްދުﷲ ޖިހާދެވެ.
އިކޮނޮމިކް ޑިވެލޮޕްމަންޓް އެންޑް ޓްރޭޑް މިނިސްޓްރީން އިއްޔެކުރި އިއުލާނުގައިވާ ގޮތުން މިފްސާއިން ސީއީއޯއެއް ހޯދަނީ ފަސް އަހަރު ދުވަހުގެ މުއްދަތަކަށެވެ.
އެހެންނަމަވެސް މަސައްކަތަށް ބަލައި މަގާމުގެ މުއްދަތު އިތުރުކުރެވިދާނެ ކަމަށް ބުނެފައިވެ އެވެ. ތައުލީމާއި ތަޖުރިބާއަށް ބަލައި ދެ ފަރާތުން އެއްބަސްވާ މުސާރައެއް ދެވިދާނެ ކަމަށެވެ.
ސީއީއޯގެ މަގާމަށް ކުރިމަތިލާ ފަރާތްތަކުގެ ކިބައިގައި ހުންނަން ޖެހޭނެ ކަމަށް ބުނެފައިވާ ޝަރުތުތަކުގެ ތެރޭގައި ފައިނޭންޝަލް ދާއިރާއިން މަދުވެގެން 10 އަހަރު ދުވަހުގެ ތަޖުރިބާ ހުރުމާ އެކު ކަމާ ގުޅުންހުރި ދާއިރާއަކުން މާސްޓާސް ޑިގްރީ ހާސިލުކޮށްފައިވުން ހިމެނެ އެވެ.
މަގާމަށް ޝައުގުވެރިވާ ފަރާތްތަކުން ކުރިމަތިލުމުގެ ފުރުސަތު ހުޅުވާލާފައި ވަނީ އަންނަ މަހުގެ 5 ވަނަ ދުވަހުގެ މެންދުރުފަހު 2:00 އާ ހަމައަށެވެ. ވަޒީފާއަށް އެދި ހުށަހަޅަން ޖެހޭ ލިޔެކިޔުންތައް ފޮނުވަން އެދިފައި ވަނީ [email protected] މެދުވެރިކޮށެވެ.
