ހެޔޮވެރިކަމެއް ކުރިއަރުވައި ޑިމޮކްރެޓިކް އުސޫލުތައް ހަރުދަނާކުރަން ބޮޑެތި މަސައްކަތްތަކެއް ދަނީ ކުރަމުން: ނައިބު ރައީސް
ހެޔޮވެރިކަމެއް ކުރިއެރުވުމަށާއި ޑިމޮކްރެޓިކް އުސޫލުތައް ހަރުދަނާ ކުރުމަށް ދިވެހިރާއްޖެއިން ވަރަށް ބޮޑެތި މަސައްކަތްތަކެއް ކުރަމުންދާ ކަމުގައި ރައީސުލްޖުމްހޫރިއްޔާގެ ނައިބު، އަލްއުސްތާޒު ހުސައިން މުހައްމަދު ލަތީފް ވިދާޅުވެއްޖެ އެވެ.
ސަމޯއާގައި މިހާރު ކުރިއަށްދާ ކޮމަންވެލްތު ހެޑްސް އޮފް ގަވަމަންޓް މީޓިން (ޗޮގަމް) ގެ އެގްޒެކެޓިވް ސެޝަންގައި ބައިވެރިވެ ވަޑައިގެން ވާހަކަފުޅު ދައްކަވަމުން ނައިބު ރައީސް ވިދާޅުވީ ޑިމޮކްރަސީ އާއި އިންސާނީ ހައްގުތަކާއި ސުލްހަމަސަލަސްކަމާއި ތަފާތު ފިކުރުތަކަށް އިހުތިރާމު ކުރުމަކީ މުޖުތަމައުތައް ކުރިއަރައި ދިއުމުގެ މައިގަނޑު ތަނބުތައް ކަމަށެވެ. މި އަސާސްތަކުގެ ސަބަބުން ގާނޫނީ ވެރިކަން ދެމެހެއްޓުމާއި ހެޔޮވެރިކަމުގެ މަގަށް މަގުފަހިވެގެންދާ ކަމަށެވެ.
މިނިވަންކަމާއި އިންސާފުވެރިކަމާ އެކު، ރައްޔިތުންގެ މަޖިލިހުގެ އިންތިހާބާއި އަދި ލޯކަލް ކައުންސިލުތަކުގެ އިންތިހާބުގެ ހަތަރު ބުރެއް ކާމިޔާބުކަމާ އެކު ބޭއްވިފައިވުމަކީ ހަރުދަނާ ޑިމޮކްރެޓިކް ނިޒާމެއް ބިނާކުރުމަށް ރާއްޖެއިން މަސައްކަތްކުރާކަން ދަލީލުކޮށްދޭ ކަމެއްކަން ފާހަގަކުރެއްވި އެވެ.
ނައިބު ރައީސްގެ ވާހަކަފުޅުގައި ވަނީ މި އިންތިހާބުތައް އޮބްޒާވްކުރުމުގައި ކޮމަންވެލްތުގެ ސެކްރެޓޭރިއެޓުން އަދާކުރައްވާފައިވާ މުހިންމު ދައުރަށް ޝުކުރު އަދާކުރައްވާފަ އެވެ. އަދި ކޮމަންވެލްތުގެ އިންތިހާބީ އެހީތެރިކަން އިތުރަށް ހަރުދަނާ ކުރުމަށާއި އިންތިހާބާ ބެހޭ އޮފިޝަލުންނާއި މުއައްސަސާތައް ތަމްރީނުކޮށް، ކަމާ ބެހޭ ނިޒާމުގެ ފުރިހަމަ ޕްލޭނެއް އެކުލަވާލުމަށާ އަދި އޮބްޒަވޭޝަން ރިޕޯޓުތަކުގެ ދުވެލި ހަލުވިކުރުމާއި ރިކޮމެންޑޭޝަންތައް ތަންފީޒު ކުރުމަށް އޮބްޒަވޭޝަން ގްރޫޕުތަކަށް ފަންނީ އެހީތެރިކަން ފޯރުކޮށްދިނުމަށް ލަފާދެއްވި އެވެ.
އޭގެ އިތުރުން ޑިމޮކްރެޓިކް މުއައްސަސާތައް ހަރުދަނާ ކުރުމަށް ކޮމަންވެލްތާ އެކު ދިވެހި ސަރުކާރުން މަސައްކަތް ކުރާނެކަމުގެ ޔަގީންކަން ދެއްވި އެވެ.
ސަމޯއާގައި ބާއްވާ ކޮމަންވެލްތު ގައުމުތަކުގެ އިސްވެރިންގެ މި އަހަރުގެ ބައްދަލުވުމުގައި ބައިވެރިވާ ރާއްޖޭގެ ވަފުދުގެ އިސް ލީޑަރެއްގެ ގޮތުގައި މިފަހަރު ވަޑައިގެންނެވީ ނައިބު ރައީސް އެވެ.
