ކޯވިޑް19 ޖެހިފައިވާ މީހަކު އާންމު ތަންތަނަށް ކުޅު ޖަހައިފިނަމަ ސައުދީގައި މަރުގެ އަދަބު ދެވިދާނެ
ކޮވިޑް19 ޖެހިފައި ހުރި މީހަކު ކުޅު ޖަހައި ސައުދީގެ މޯލްއެއްގެ ތެރޭގައި ވައިރަސް ފަތުރަން މަސައްކަތްކޮށްފައިވާއިރު އޭނާއަށް މަރުގެ އަދަބު ވެސް ލިބިދާނެކަމަށް ސައުދީގެ ކަމާއި ބެހޭ ފަރާތްތަކުން ބުނެފިއެވެ.
މި މީހާ ހައްޔަރުކޮށްފައިވަނީ އެ މޯލް ގެ ޓްރޯލީތަކާއި ދޮރުތަކަށް ކުޅުޖަހައި ވައިރަސް ފަތުރަން މަސައްކަތް ކުރިކަމުގެ ކުށުގައެވެ. މިކަން ކޮށްފައިވަނީ ސައުދީ ގައި ދިރިއުޅޭ އެހެން ގައުމެއްގެ ރައްޔިތެކެެވެ. އެމީހާގެ ވަނަވަރު ސައުދީއިން ހާމަކޮށްފައިނުވާއިރު ކަމާއި ބެހޭ ފަރާތްތަކުން ގެންދަނީ މި މައްސަލަ އިތުރަށް ތަހުގީގު ކުރަމުންނެވެ.
އެގޮތުން ސައުދީ ފުލުހުން ދަނީ އެމީހާއާއި ކޮންޓެކްޓުވެފައިތިބި މީހުން ހޯދުމުގެ އިތުރުން ސީސީޓީވީ ގެ ޒަރީއާއިން އެމީހާ އެހެން ތަނެއް އިންފެކްޓުކޮށްފައި ހުރިތޯވެސް ބަލަމުންނެވެ.
މިހާތަނަށް ހޯދުނު އެއްވެސް ހޯދުމަކުން އޭނާ އެކަން ކުރި ސަބަބެއްވެސް އަދި އެކަން ކުރީ ވައިރަސް ޖެހި ހުރިކަން އެނގިކަން ވެސް ހޯދިފައެއް ނުވެއެވެ. ނަމަވެސް ސައުދީގެ ކަމާއި ބެހޭ ފަރާތްތަކުން ބުނާ ގޮތުގައި އެމީހާގެ މައްޗަށް ދައުވާ ސާބިތުވެއްޖެނަމަ ގަސްތުގައި ބައެއްގެ ފުރާނައަށް ގެއްލުން ދިނުމުގެ ކުށުގައި މަރުގެ ހުކުމް ތަންފީޒުކުރެވިގެންދާނެއެވެ.
ސައުދީއިން މިހާތަނަށް ކޮރޯނާ ވައިރަހަށް 1104 މީހުން ޕޮސިޓިވް ވެ 3 މީހަކު މަރުވެފައިވާއިރު ސައުދީއިން ގެންދަނީ ވައިރަސް ކޮންޓްރޯލްކުރުމަށް ގިނަ ފިޔަވަޅުތަކެއް އަޅަމުންނެވެ. އެގޮތުން އުމްރާއަށް މީހުން ދިއުން މަނާކޮށް ހަރަމްފުޅު ހިމެނޭހެން ހުރިހާ މިސްކިތެއް ވެސް ބަންދުކޮށްފައެވެ.
Ads by STO
