ކައުންސިލުގެ ހިއްސާ އިތުރު ކުރަންޖެހޭ: މިނިސްޓަރު
ކައުންސިލުތަކަށް އޮންނަ ހިއްސާއާ ދައުރު މިހާރަށްވުރެ އިތުރުކުރަންޖެހޭ ކަމަށް ސިޓީސް ލޯކަލް އެންޑް ގަވަމަންޓް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.
ކޮޅުމަޑުލު އިސްރަށްވެހިންގެ މަހާސިންތާ 2024 ހުޅުވައިދެއްވުމަށް ރޭ އެ އަތޮޅު ވެރިރަށް ވޭމަންޑޫގައި ބޭއްވި ރަސްމިއްޔާތު ޝަރަފުވެރިކޮށްދެއްވަމުން މިނިސްޓަރު ވިދާޅުވީ ސަރުކާރުގެ ފަރާތުން ކުރާ ކޮންމެ ކަމެއް ކުރުމުގައި ރައްޔިތުންނާ ހަމައަށް ގޮސްގެން އެ ކަމެއް ކުރާ ކަމަށްވާނަމަ، އެކަމެއްގައި ރަށްރަށުގެ ކައުންސިލްގެ ދައުރު އޮންނަންޖެހޭ ކަމަށެވެ.
"ރަށްރަށުގައި ކުރާ ކަންތައްތައް އެއީ ނަރުދަމާ ކަމަށް ވިއަސްވެސް، އެއީ ފެނުގެ ޚިދުމަތް ކަމަށް ވިއަސްވެސް، ނުވަތަ ކަރަންޓުގެ ހިދުމަތެއް ކަމަށް ވިޔަސް، ނުވަތަ އެ ރަށެއްގައި ދައުލަތުން ނުވަތަ ސަރުކާރުގެ ފަރާތުން ވަކި މުއައްސަސާއެއް ގާއިމްކުރުން ކަމަށް ވިޔަސް، އެ ކަމެއް ކުރުމުގައި ރައްޔިތުންގެ ފަރާތުން ވާހަކަ ދައްކާ މަޝްވަރާކުރަން ތިބޭ ބަޔަކީ ކައުންސިލުތައް"
މިނިސްޓަރު ވިދާޅުވީ މިހާރު ހިނގަމުންދާ ލާމަރުކަޒީ ނިޒާމު ތައާރަފުކުރެވިގެން ދިޔައީ ވެސް، އަދި ލާމަރުކަޒީ ނިޒާމަށް ބަދަލު ގެނައުމަށްޓަކައި ގާނޫނު އަސާސީވެސް ބަދަލު ގެނެސްފައިވާއިރު ލާމަރުކަޒީ ގާނޫނަށް ވެސް ގިނަ އިސްލާހުތަކެއް މިހާރު ވެސް ގެނެވިފައިވާ ކަމަށެވެ.
އާދަމް ޝަރީފް ވިދާޅުވީ ރައްޔިތުން ވޯޓު ދީގެން، ރައްޔިތުންގެ ހައްގުގައި ބަސް ބުނަން ތިބި ބަޔަކީ ކައުންސިލަރުން ކަމަށް ވާތީ، ރައްޔިތުންގެ ހައްގުގައި ވަކާލާތު ކުރުމުގެ ފުރުސަތާއި، ރައްޔިތުން ބޭނުންވާ ކަންތައްތައް ބުނުމުގެ ފުރުސަތު ކައުންސިލަރުންނަށް އެބަ އޮތް ކަމަށެވެ. އަދި މިހާރު ކަންކަން ނިންމާނީ ހަމައެކަނި މާލެ އިން ނޫން ކަމަށްވެސް މިނިސްޓަރު ފާހަގަކުރެެއްވި އެވެ.
މީގެ އިތުރުން ވިދާޅުވީ ކަތީބުންނާއި، އަތޮޅުވެރީންގެ ވާހަކައަކީ މަލްޓިޕާޓީ ޑިމޮކްރަސީގައި މިހާރު އެއް ގޮތަކަށްވެސް ދެކެވޭ ވާހަކައެއް ނޫން ކަމަށެވެ.
"އެންމެފަހުން ގައުމީ ޔުނިވާސިޓީން ހެދި ދިރާސާއިން ވެސް ފެނިގެން ދިޔައީ ލާމަރުކަޒީ ނިޒާމު ދިވެހި ރައްޔިތުން ބަލައިގެންފި ކަން. ދިވެހިރާއްޖޭގެ ވެރިކަން ލާމަރުކަޒީ ނިޒާމާ އެއް ގޮތަށް އޮންނަން ޖެހޭ ކަން. އެހެންވީމާ ރާއްޖޭގައި އޮންނާނީ ލާމަރުކަޒީ ނިޒާމު"
ލާމަރުކަޒީ ނިޒާމު ރަނގަޅުކުރުމަށްޓަކައި ކޮންމެ ސަރުކާރަކުން ވެސް ގިނަ މަސައްކަތްތަކެއް ކުރައްވާފައިވާ ކަމަށް އޭނާ ވިދާޅުވި އެވެ. އަދި މި ނިޒާމު ފުރަތަމަ ތައާރަފުކުރެވުނު އިރުގައި ވެސް ނިޒާމުގައި ރަނގަޅުކުރަންޖެހޭ އެތައް ކަމެއް ހުރިކަން ފާހަގަކުރެއްވި އެވެ.
އެ މަހާސިންތާ 2024 ގައި ކޮޅުމަޑުލުގެ ރަށްރަށުގެ ކައުންސިލްތަކުގެ ރައީސުންނާއި، ސެކްރެޓަރީ ޖެނެރަލުންނާއި، އަތޮޅުގެ ކަންކަން ބަލަހައްޓަވައި ދައުލަތުގެ މުއައްސަސާތަކުގެ ވެރިންނާއި ޚާއްޞަ މަންދޫންނާއެކު ގާތްގަނޑަކަށް ސާޅީހަކަށް ބޭފުޅުން ބައިވެރިވެވަޑައިގަންނަވަ އެވެ.
