އިޒްރޭލް ޕާސްޕޯޓު މައްސަލަ 241 ކޮމިޓީއަށް އެޖެންޑާކޮށްފި
އިޒްރޭލް ޕާސްޕޯޓުގައި ރާއްޖެއަށް އެތެރެވުން މަނާކުރަން އިމިގްރޭޝަން ގާނޫނަށް އިސްލާހު ގެނައުމަށް ހުށަހަޅާފައިވާ ބިލުގެ މަސައްކަތް ރައްޔިތުންގެ މަޖިލިހުގެ ސަލާމަތީ ހިދުމަތްތަކާ ބެހޭ ކޮމިޓީ، 241 ކޮމިޓީއަށް އެޖެންޑާކޮށްފި އެވެ.
ވަޒީރުންގެ މަޖިލިހުގެ މަޝްވަރާ އާއި ލަފާގެ މަތިން އިޒްރޭލް ޕާސްޕޯޓުގައި ރާއްޖެއަށް ނުވަދެވޭ ގޮތަށް އިމިގްރޭޝަން ގާނޫނަށް ގެންނަން ޖެހޭ ބަދަލުތައް ގެނައުމަށް ރައީސް ޑރ. މުހައްމަދު މުއިއްޒު ނިންމަވާފައި ވަނީ މިދިޔަ ޖޫން މަހުގެ ދެ ވަނަ ދުވަހު އެވެ.
އެގޮތަށް ނިންމިއިރު، އިޒުރޭލު ޕާސްޕޯޓު މަނާކުރުމާ ގުޅޭގޮތުން ގަލޮޅު ދެކުނު ދާއިރާގެ އެމްޑީޕީގެ މެމްބަރު މީކާއީލް އަހުމަދު ނަސީމް ހުށަހެޅުއްވި ބިލު ބަލައިގަނެ، 241 ކޮމިޓީއަށް ވަނީ ފޮނުވާފަ އެވެ. އެހެންކަމުން ސަރުކާރުންނާއި ވެރިކަން ކުރާ މައި ޕާޓީ ޕީޕަލްސް ނޭޝަނަލް ކޮންގްރެސް، ކޮންގްރެސް ޕާޓީން ނިންމީ މީކާއީލް ހުށަހެޅުއްވި ބިލާ އެކު ކުރިއަށް ދިއުމަށެވެ.
ނަމަވެސް އިޒްރޭލް ޕާސްޕޯޓް އޮތް އެންމެނަށް ޖުމްލަ މާނައެއް ދިނުމުގެ ބަދަލުގައި ބިލުގައި އޮތް ގޮތް ބަދަލު ކުރުމާ މެދު ވިސްނައި ދިރާސާ ކުރަން ޖެހޭނެ ކަމަށް ބަންޑާރަ ނައިބު އަހުމަދު އުޝާމް މީގެކުރިން ވިދާޅުވެފައިވެ އެވެ.
މީގެ ފަސް މަސް ދުވަސް ކުރިން، މިދިޔަ ޖޫން މަހުގެ ކުރީކޮޅު މީކާއީލް ހުށަހެޅުއްވި ބިލު ކޮމިޓީއަށް ފޮނުވި ނަމަވެސް މިހާތަނަށް އެ ބިލުގެ މަސައްކަތް އޮތީ ނުފަށަ އެވެ. އެކަމުގެ ކަންބޮޑުވުން ކޮންގްރެސް ޕާޓީންނާއި އިދިކޮޅު މައި ޕާޓީ މޯލްޑިވިއަން ޑިމޮކްރެޓިކް ޕާޓީ، އެމްޑީޕީން ވަނީ ފާޅުކޮށްފަ އެވެ. އޭގެ އިތުުރުން ކަމާ ގުޅިގެން އާންމުންގެ ހުރި ކަންބޮޑުވުންތައް ވެސް ދަނީ ފާޅުކުރަމުންނެވެ.
އިޒްރޭލް ޕާސްޕޯޓު މައްސަލަ އެޖެންޑާކޮށްފައި ވަނީ އަންނަ އަންގާރަ ދުވަހުގެ ހެނދުނު 9:00 ގައި ބާއްވާ 241 ކޮމިޓީގެ ބައްދަލުވުމަށެވެ.
ޕާސްޕޯޓު މައްސަލަ ކޮމިޓީއަށް އެޖެންޑާ ކުރުމާ ގުޅޭގޮތުން 241 ކޮމިޓީގެ ނައިބު މުގައްރިރު އިނގުރައިދޫ ދާއިރާގެ މެމްބަރު އިބްރާހީމް ފަލާހު "ދެން" އަށް ވިދާޅުވީ ކޮމިޓީއަކީ މަޖިލިހުގައި ތަމްސީލުކުރާ ހުރިހާ ސިޔާސީ ޕާޓީތަކެއްގެ މެމްބަރުންގެ ބައިވެރިވުން އޮތް ކޮމިޓީއެއް ކަމަށެވެ.
"މަޝްވަރާގެ މަތިން ކަމާ ގުޅުންހުރި ފަރާތްތަކަށް ކޮމެންޓްސްއަށް ފޮނުވާނެ. ކަމާ ގުޅުންހުރި ފަރާތްތައް އަޅުގަނޑުމެން ހާޒިރުކޮށް، އެ ބޭފުޅުންނާ މި ކަމުގައި މަޝްވަރާކޮށް ލަފަޔާއި އިރުޝާދު ހޯދާނެ،" ފަލާހް ވިދާޅުވި އެވެ.
ކޮންގްރެސް ޕާޓީގެ ޕީޖީ ލީޑަރު ވިދާޅުވީ އިޒްރޭލުން ފަލަސްތީނުގައި ހިންގަމުން އަންނަ ލާއިންސާނީ އަމަލުތައް ހުއްޓާލުމަށް ގޮވާލައްވާ ދުނިޔޭގެ އިސްވެރިންގެ ތެރެއިން އެކަމުގައި އެންމެ ބޮޑަށް އަޑުއުފުއްލަަވަމުން ގެންދަވަނީ ރާއްޖޭގެ ރައީސް ކަމަށެވެ. އެގޮތުން ދިވެހި ސަރުކާރުން އިޒްރޭލުގެ ޕާސްޕޯޓު މަނާކުރުމަށް ނިންމާފައިވާކަން ފާހަގަކުރެއްވި އެވެ.
Ads by STO
