ކުޅުދުއްފުއްޓަށް ކާގޯ ބޯޓުތަކުގެ ދަތުރުތައް އަންނަ މަހު ފަށަނީ
ޕެރިޝަބަލް އަދި ޖެނެރަލް ކާގޯ އުފުލާ ބޯޓުތައް އިންޑިއާގެ ޓުޓިކޮރިންއިން ކުޅުދުއްފުށި ސިޓީއަށް ސީދާ ދަތުރުތައް އަންނަ މަހު ފެށޭނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ މުހައްމަދު ވަޖީހު ވިދާޅުވެއްޖެ އެވެ.
އެ ކުންފުނިން އިއްޔެ އެކްސްގައި ކުރި ޕޯސްޓެއްގައި ބުނީ، އިންޑިއާއިން ކުޅުދުއްފުއްޓަށް ކާގޯ ބޯޓުތަކުގެ ސީދާ ދަތުރުތައް ފެށުމާއި ގުޅޭގޮތުން އެރަށުގެ ވިޔަފާރިވެރިންނާއެކު ވަޖީހާއި އެމްޕީއެލްގެ މެނޭޖްމެންޓް ޓީމުން މަޝްވަރާ ބައްދަލުވުމެއް ބާއްވާފައިވާ ކަމަށެވެ.
މިކަމާއި ގުޅޭ އިތުރު މައުލޫމާތު ދެއްވަމުން ވަޖީހު "ދެން" އަށް ވިދާޅުވީ، ކުޅުދުއްފުއްޓާއި، އައްޑޫ އަށް ދާއިމީކޮށް އިންޑިއާއިން ކާގޯ ބޯޓުތަކުގެ ދަތުރުތައް ކުރުމުގެ މަސައްކަތް މިއަހަރު އެ ކުންފުނިން ފަށާފައިވާ ކަމަށެވެ. އަދި މިހާރު އައްޑޫގައި އެކަން ކާމިޔާބު ކަމާއެކު ހިނގަމުންދާކަން ފާހަގަ ކުރެއްވި އެވެ.
ވަޖީހު ވިދާޅުވީ، ފުރަތަމަ މި މަޝްރޫއު ފެށީ އައްޑޫގައި ކަމަށާއި، މިހާރު މަހެއްގެ މައްޗަށް 3 ބޯޓު އެ ޕޯޓުގައި ބަނދަރު ކުރާ ކަމަށެވެ. އަދި މިހާރު މަސައްކަތް ފަށާފައިވަނީ އައްޑޫގައި ކާގޯގެ ހިދުމަތް ދެމުންދާ ބީދައިން އެރަށުގައި ވެސް އެ ހިދުމަތް ފެށުމަށް ކަމަށް ވިދާޅުވި އެވެ.
"އިއްޔެ މި ވާހަކަ ދެއްކީ. އެހެންވީމަ، މި މަސް ނިމޭ ހިސާބުގައި ނުވަތަ އަންނަ މަހުގެ ކުރީކޮޅުގައި ބޯޓުތަކުގެ ދަތުރުތައް ފެށޭނެ ކަމަށް ބަަލައިގެން މިއުޅެނީ. އަޅުގަނޑުމެންގެ ޓާގެޓަކީ، ޕެރިޝަބަލް އަދި ޖެނެރަލް ކާގޯގެ އިތުރަށް ކޮންސްޓްރަކްޝަން މެޓީރިއަލް ވެސް އެތެރެކުރުން،" ވަޖީހު ވިދާޅުވި އެވެ.
އިތުރަށް ވަޖީހު ވިދާޅުވީ، މިހާރުވެސް އުތުރުގައި އަދި ހާއްސަކޮށް ހއ. އަދި ހދ. އަތޮޅުގައި ހިލައާއި ހިލަވެއްޔަށް ބޮޑު ޑިމާންޑެއް އޮތް ކަމަށެވެ.
އެމްޕީއެލްއިން ވަނީ ދާއިމީ ގޮތެއްގައި ކާގޯގެ ހިދުމަތް ދިނުމާއި ގުޅިގެން އިންޑިއާގެ އެކްސްޕޯޓަރުންނާއި ބޯޓުތައް އޮޕަރޭޓް ކުރާމީހުންނާއެކު ވެސް މަޝްވަރާ ކޮށްފައެވެ. އަދި އެ ފަރާތްތަކުން ވަނީ މުދާ ލިބޭ ކަމަށްވާނަމަ، ދާއިމީ ގޮތެއްގައި އެ ހިދުމަތް ދެމުން ދާނެ ކަމުގެ ޔަގީންކަން ދެއްވާފައި ކަމަށް އެ ކުންފުނީގެ ސީއީއޯ ވިދާޅުވި އެވެ.
