ސީ-ޓު-އެއާ ޓްރާންސްޝިޕްމެންޓް: ކެނެޑާއަށް 8.2 ޓަނުގެ މުދާ ފޮނުވައިފި
ސީ-ޓު-އެއާ ޓްރާންސްޝިޕްމަންޓް ކާގޯގެ ހިދުމަތަށް އަލަށް ގުޅުނު ބްރިޓިޝް އެއާވޭސްގެ ފްލައިޓެއްގައި 8.2 ޓަނުގެ މުދާ ކެނެޑާއަށް ފޮނުވައިފި އެވެ.
ވެލާނާ އިންޓަނޭޝަނަލް އެއާޕޯޓުގެ ރަސްމީ އެކްސް އެކައުންޓުން ކުރި ޕޯސްޓެއްގައި ބުނީ، ބްރިޓިޝް އެއާވޭސްއަކީ ސީ-ޓު-އެއާ ކާގޯ ހިދުމަތާ ގުޅުނު 11 ވަނަ އެއާލައިން ކަމަށެވެ.
މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ދެމުންދާ ކަނޑު މަގުން މުދާ ގެނެސް ވައިގެ މަގުން މުދާ އެއްތަނުން އަނެއް ތަނަށް ފޯރުކޮށްދިނުމުގެ ހިދުމަތުގެ ތެރެއިން, ބްރިޓިޝް އެއާވޭސް މެދުވެރިކޮށް ކެނެޑާއަށް ފޮނުވާފައިވާ މުދާތަކަކީ، ސްރީލަންކާ އިން ރާއްޖެ ގެނެސްފައިވާ މުދާ ތަކަކެވެ.
އެ ކުންފުނީގެ ސީއީއޯ މުހައްމަދު ވަޖީހު "ދެން" އަށް މައުލޫމާތު ދެއްވަމުން ވިދާޅުވީ، މިހާރު މާލެ އަންނަ ކޮންމެ ބޯޓަކުން ސީ-ޓު-އެއާ ކާގޯގެ ގޮތުގައި ކޮންޓެއިނާއެއް ނުވަތަ ދެ ކޮންޓެއިނާވަރު ލިބެމުންދާ ކަމަށެވެ. އަދި އެ ހިދުމަތަށް ޑިމާންޑް އޮންނަ މިންވަރު އިތުރުވަމުންދާކަން ފާހަގަކުރައްވާ ވަޖީހު ވިދާޅުވީ މިހާރު އިންޑިއާއިން ވެސް ސީ-ޓު-އެއާ ކާގޯގެ ގޮތުގައި ރާއްޖެއަށް މުދާ ފޮނުވަމުންދާ ކަމަށެވެ.
"މިދިޔަ ހަފްތާގައި ފޮނުވި އިންޑިއާއިން ވެސް ކޮންޓެއިނާއެއް. އިންޑިއާއިން ކޮންޓެއިނާ ފޮނުވަން ޖެހުނު ސަބަބަކީ، އިންޑިއާގެ އެއާޕޯޓަށްވުރެ ރާއްޖޭގެ އެއާޕޯޓުން އެކަން ކުރަން ފަސޭހަ ވާތީ ވިޔަފާރިވެރިން އެގޮތަށް ޗޫޒް ކުރީ،" ވަޖީހު ވިދާޅުވި އެވެ.
އިތުރަށް ވަޖީހު ވިދާޅުވީ، ސީ-ޓު-އެއާ ކާގޯގެ ގޮތުގައި މުދާ ލިބެމުންދާ ވަރު ދަނީ ދުވަހެއް ދުވަހަކަށްވުރެ އިތުރުވަމުން ކަމަށެވެ.
މި އަހަރުގެ މާޗު މަހު ޓާކިޝް އެއާލައިނާ އެކު ސޮއިކޮށް އެމްޕީއެލުން ތައާރަފުކުރި ސީ-ޓު-އެއާ ޓްރާންސްޝިޕްމަންޓް ކާގޯގެ ހިދުމަތުގެ ފުރަތަމަ ޝިޕްމަންޓް ރާއްޖޭން ފޮނުވީ މެއި މަހުގެ ތެރޭގަ އެވެ. ރާއްޖޭގައި ހިދުމަތް ފެށި ފަހުން ކަމަށް ލިބޭ ތަރުހީބު ބޮޑުވެ، ޑިމާންޑް ވަނީ ވަރަށް ބޮޑަށް އިތުރުވެފަ އެވެ. ވައިގެ މަގުން ބޭރު ކުރަމުން އައި ކޮންޓެއިނަރުގެ އަދަދު މަހުން މަހަށް އައީ އިތުރުވަމުންނެވެ.
އެގޮތުން ސެޕްޓެމްބަރު މަހު 55 ކޮންޓެއިނަރުގެ މުދާ އެކްސްޕޯޓް ކުރެވުނުއިރު، ނިމިދިޔަ މަހު އެ އަދަދު 96 އަށް އިތުރުވެފައިވާ ކަމަށް ވަޖީހް ވިދާޅުވި އެވެ. އެއީ 418 ޓަނުގެ މުދާ ނުވަތަ 34،946 ދާގީނާ އެވެ.
