އާމްދަނީގެ ބޮޑުބަޔަކުން ދަރަނި އަދާކުރަން ޖެހެނީ ބަޔަކު މީހުން ދައުލަތް ދޮވެލީމާ: މުސްތަފާ
ދައުލަތުގެ އާމްދަނީގެ ބޮޑު ބައެއް ދަރަނި އަދާކުރުމަށް ހޭދަ ކުރަން ޖެހިފައި ވަނީ ބަޔަކު މީހުން ދައުލަތް ދޮވެލައި، ބަނގުރޫޓުކޮށްފައި ދިއުމުން ކަމަށް މާފަންނު ހުޅަނގު ދާއިރާގެ ކޮންގްރެސް ޕާޓީގެ މެމްބަރު މުހައްމަދު މުސްތަފާ އިބްރާހިމް ވިދާޅުވެއްޖެ އެވެ.
ރައްޔިތުން މަޖިލިހުގައި މިއަދު ކުރިއަށްދާ ޖަލްސާގައި އަންނަ އަހަރަށް ލަފާކުރާ ދައުލަތުގެ ބަޖެޓަށް ބަހުސް ކުރައްވަމުން މުސްތަފާ ވިދާޅުވީ މި ބަޖެޓުގައި އަމާޒު ހިފާފައިވަނީ ދަރަނި ކުޑަކުރަން ކަމަށެވެ.
ޖީޑީޕީގެ 60 އިންސައްތައިގައި ދަރަނީގެ އަދަދު ބާއްވަން ބޭނުންވާ ކަމަށާއި ނަމަވެސް އެހެން އެކަން ކުރެވެން ނެތީ ބަޔަކު މީހުން މި ގައުމުގެ ދައުލަތް ދަރުވާލާފައިވުމުން، ދަރަނިތައް ސަލާމަތް ކުރަން ޖެހޭތީ ކަމަށް މުސްތަފާ ވިދާޅުވި އެވެ.
"ދައުލަތުގެ މާލިއްޔަތު ދޮވެލައިގެން ނުކުމެގެން އެ ދިޔައީ. ޖީޑީޕީގެ ނިސްބަތުން 127.2 އިންސައްތައަށް ދިއުމަކީ ނުރައްކަލެއް. ނުރައްކާތެރި ސިގްނަލެއްގެ ވާހަކަ އަޅުގަނޑުމެން މި ދައްކަނީ. މި ސިގްނަލާއި ހިސާބަށް ދައުލަތް ގެންގޮސްފައި، ދެން ނުކުމެގެން ގޮސް އެ ވާހަކަ ދައްކަން ލަދުގަންނަން ޖެހޭ،" މުސްތަފާ ވިދާޅުވި އެވެ.
އިތުރަށް އޭނާ ވިދާޅުވީ މި އަހަރު ދައުލަތުގެ ދަރަނީގެ ޖުމުލަ އަދަދު ޖީޑީޕީގެ ނިސްބަތުން 127.2 އިންސައްތައިގައި ހުރި ނަމަވެސް، 2025 ވަނަ އަހަރަށް ލަފާކުރާ ބަޖެޓުގައި އެ އަދަދު ޖީޑީޕީގެ ނިސްބަތުން 124.8 އިންސައްތައަށް ތިރިކުރެވިފައިވާ ކަމަށެވެ.
"ދައުލަތަށް ވަންނަ ކޮންމެ 100 ރުފިޔާއަކުން، 24 ރުފިޔާ އަޅުގަނޑުމެން މި ހޭދަކުރަން ޖެހެނީ ދަރަނި އަދާކުރަން. އެހެންވީމަ، މި ބަޖެޓް ބޮޑު ކަމަށް އަޅުގަނޑުމެންނަށް ވަރަށް ބޮޑަށް ފެނިގެންދަނީ،" މުސްތަފާ ވިދާޅުވި އެވެ.
މާފަންނު ހުޅަނގު ދާއިރާގެ މެމްބަރު ވިދާޅުވީ ބަޖެޓުން ގައުމުގެ ކުރިމަގު އޮތްގޮތް ވަރަށް ސާފުކޮށް ފެނިގެންދާ ކަމަށެވެ. އެގޮތުން ބަޖެޓުގައިވާ ގޮތުން ދައުލަތުގެ ހަރަދު ވަނީ 7.6 މިލިއަން ރުފިޔާއަށް ކުޑަކުރެވިފައިކަން ފާހަގަކުރެއްވި އެވެ. އަދި 4.8 މިލިއަން ރުފިޔާ ދައުލަތުގެ އާމްދަނީއަށް އިތުރުވެގެންދާ ކަމަށް ވިދާޅުވި އެވެ.
