އިއްޔެގެ ސައިކަލުބުރުގައި ހައްޔަރުކުރި އެންމެން ޖޫރިމަނާ ކުރިނަމަވެސް ލައިސަންސް ނުހިފަހައްޓާ
ޒުވާނުންތަކެއް އިންތިޒާމު ކޮށްގެން އިއްޔެ ހަވީރު މާލޭގައި ބޭއްވުމަށް މަސައްކަތްކުރި ސައިކަލުބުރުގެ ހަރަކާތުގެ ތެރެއިން ފުލުހުންގެ ބެލުމުގެ ދަށަށް ގެންދިޔަ އެންމެން ޖޫރިމަނާ ކޮށްފިއެވެ.
ފުލުހުން ބުނީ އިއްޔެގެ އެއްވުމުގެ ތެރެއިން ފުލުހުންގެ ބެލުމުގެ ދަށަށް ގެންދިޔަ އެންމެން ޖޫރިމަނާކޮށް އެކަކު ފިޔަވާ އެންމެން ދޫކޮށްލާފައިވާ ކަމަށެވެ.ނަމަވެސް އޭގެން އެއްވެސް މީހެއްގެ ލައިސަންސް ހިފަހައްޓާފައި ނުވާ ކަމަށް ފުލުހުން ބުންޏެވެ.
އާންމު ސިއްހަތުގެ ކުއްލި ނުރައްކަލުގެ ހާލަތުގައި ރައްޔިތުން ނުރައްކަލުގެ ތެރެއަށް ހުށައެޅޭގޮތަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ގައިޑްލައިންތަކާއި ޚިލާފަށް އެއްވުމާއި ގުޅިގެން އިއްޔެ ފުލުހުންގެ ބެލުމުގެ ދަށަށް ގެންގޮސްފައިވަނީ 41 މީހެކެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ އެންގެވުމާ ހިލާފަށް އެއްވުންތައް ބާއްވާ ފަރާތްތަކާއި އެއްވުންތަކުގައި ބައިވެރިވާ ފަރާތްތަކާމެދު ޤާނޫނީ ފިޔަވަޅު އަޅާނެ ކަމަށް އެއްވުން ފެށުމުގެ ކުރިން ވެސް އިއްޔެ ފުލުހުން ވަނީ އިންޒާރު ދީފައެވެ.
ދިވެހިރާއްޖޭގައި އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާނު ކޮށްފައިވާ މި ދަނޑިވަޅުގައި، އާންމު ތަންތަނުގައި އެއްފަހަރާ ގިނަ މީހުން އެއްނުވުމަށް ޑިރެކްޓަރ ޖެނެރަލް އޮފް ޕަބްލިކް ހެލްތު އަންގަވާފައިވާ އެންގެވުމާ ހިލާފަށް ބައެއް ފަރާތްތަކުން އެއްވުން ބޭއްވުމަށް ރާވަމުންދާކަމުގެ މައުލޫމާތު ފުލުހުންނަށް ލިބިފައިވާ ކަމަށްވެސް އިއްޔެ ފުލުހުން ވަނީ ވިދާޅުވެފައެވެ.
