ނަމޫނާ އިގުތިސޯދަކަށް ކުދި އަދި މެދުފަންތީގެ ވިޔަފާރިތައް ކުރިއަރުވަން ޖެހޭ: ނައިބު ރައީސް
ނަމޫނާ އިގުތިސޯދެއް ބިނާކުރުމަށް ކުދި އަދި މެދުފަންތީގެ ވިޔަފާރިތައް ކުރިއަރުވަން ޖެހޭ ކަމަށް ރައީސުލްޖުމްހޫރިއްޔާގެ ނައިބު ހުސައިން މުހައްމަދު ލަތީފް ވިދާޅުވެއްޖެ އެވެ.
ރާއްޖޭގައި ހަރަކާތްތެރިވާ އެންމެ ކުދި، ކުދި އަދި މެދުފަންތީގެ ވިޔަފާރިތަކާއި އަމިއްލަ ފަރުދުންގެ ވިޔަފާރިތަކުން ހޯދަމުންދާ ކާމިޔާބީތައް ގައުމީ ފެންވަރުގައި ފާހަގަކޮށް، އެ ވިޔަފާރިތަކަށް ހިތްވަރު ދިނުމުގެ ގޮތުން ބިޒްނަސް ސެންޓަ ކޯޕަރޭޝަން (ބީސީސީ) ގެ ފަރާތުން "މޯލްޑިވްސް އެމްއެސްއެމްއީ އެވޯޑްސް 2025" ގެ ނަމުގައި ހާއްސަ އެވޯޑެއް ބުރާސްފަތި ދުވަހުގެ ރޭ ވަނީ އިފުތިތާހުކޮށްފަ އެވެ. އެވޯޑު އިފުތިތާހުކޮށްދެއްވީ ނައިބު ރައީސް އެވެ.
އެވޯޑު އިފުތިތާހު ކުރުމަށް ދަރުބާރުގޭ ރަންނަބަނޑޭރި މާލަމުގައި ބޭއްވި އެ ރަސްމިއްޔާތުގައި ވާހަކަފުޅު ދައްކަވަމުން ނައިބު ރައީސް ވިދާޅުވީ ރާއްޖޭގެ އިގުތިސޯދުގެ އެންމެ މައި މަސައްކަތްތަކާއި ދިރުންހުރި ހިދުމަތުގެ ސަފުހާތަކުގެ ބޮޑު ބައެއް ލިޔެވެމުން އަންނަނީ އެންމެ ކުދި އަދި މެދުފަންތީގެ ވިޔަފާރިތަކުގެ މައްޗަށް ކަމަށެވެ. އެ ވިޔަފާރިތަކަކީ އިގުތިސޯދުގެ ނާރެސް ކަމަށާއި، އެއީ ވަޒީފާގެ ފުރުސަތުތައް އުފެއްދުމާއި އާ އީޖާދުތައް ކުރުމާއި އިގުތިސޯދީ ދުވެލި ހަލުވިކުރުމުގައި އެންމެ މުހިންމު ދައުރެއް އަދާކުރާ ވިޔަފާރިތައް ކަމަށެވެ.
"މި ވިޔަފާރިތައް ހިންގާ ވިޔަފާރިވެރިންނަކީ އަޅުގަނޑުމެންގެ މުޖުތަމައުގެ ތަރައްގީ އާއި ދިރުމާއި ކުރިއެރުމަށް ޓަކައި ވަރަށް ބުރަ މަސައްކަތްޕުޅުތަކެއް ކޮށްދެއްވާ، ގައުމީ ތަރައްގީއަށް ޓަކައި ވަރަށް ބޮޑެތި ގުރުބާންވެވަޑައިގަންނަވާ ހިދުމަތްތެރިންތަކެއް،" ނައިބު ރައީސް ވިދާޅުވި އެވެ.
ކުދި އަދި މެދުފަންތީގެ ވިޔަފާރިތައް ހިންގާ ވިޔަފާރިވެރިންގެ ހިތްވަރާއި ކެރުންތެރިކަމާ އަދި އީޖާދީ ހިޔާލުތަކަކީ އިގުތިސޯދު ކުރިއަރުވާ ބާރެއް ކަމުގައި ނައިބު ރައީސް ސިފަކުރެއްވި އެވެ.
އެކާވީސް ވަނަ ގަރުނުގައި، ދެކެމުން މި އަންނަނީ ފަންނިއްޔާތުގެ އާ ކަންކަމާއި ޑިޖިޓަލް މާކެޓުތަކާއި ބައިނަލްއަގުވާމީ ވިޔަފާރީގެ ފަހި ފުރުސަތުތަކެއް ކަމަށާއި މި ދާއިރާތަކުން ފަހި ނަތީޖާ ހާސިލުކޮށް ފުރިހަމަ ކާމިޔާބަށް ވާސިލުވުމަށް، ވިޔަފާރިވެރިން މި އާ ހުނަރުތަކާއި އުކުޅުތައް ދަސްކޮށް، އޭގެ ބޭނުން ހިފަން ޖެހޭ ކަމުގައި އެމަނިކުފާނު ފާހަގަކުރެއްވި އެވެ.
"މި ވިޔަފާރިތައް ކުރިއެރުވުމަށް ޓަކައި އަދިވެސް ވަރަށް ބޮޑެތި ބުރަ މަސައްކަތްތަކެއް އެބަކުރަން ޖެހޭ. މާލީ އެހީތެރިކަމާއި ފަންނީ ތަމްރީނުތަކާއި ގާނޫނީ ލުއިތައް ހޯދައިދޭން އެބަ ޖެހޭ،" ނައިބު ރައީސް ވިދާޅުވި އެވެ.
ނަމޫނާ އިގުތިސޯދެއް ބިނާ ކުރުމުގައި އެންމެ ކުދި އަދި މެދުފަންތީގެ ވިޔަފާރިތަކުން އަދާކުރަނީ މުހިންމު ދައުރެއް ކަމަށެވެ. އެގޮތުން މިހާރަށް ވުރެ ބޮޑަށް އެކަން ދެނެ، ވިޔަފާރިތައް ކުރިއަރުވައި ވިޔަފާރިވެރިންގެ ގާބިލުކަން އިތުރުކުރުމަކީ އެންމެންގެ ވެސް ޒިންމާއެއް ކަމުގައި ފާހަގަކުރެއްވި އެވެ. ވުމާ އެކު އިގުތިސޯދު އިތުރަށް ކުރިއަރުވަން ގުޅިގެން މަސައްކަތް ކުރުމަށް އެމަނިކުފާނު އިލްތިމާސްކުރެއްވި އެވެ.
މޯލްޑިވްސް އެމްއެސްއެމްއީ އެވޯޑުގެ މަގުސަދަކީ ރާއްޖޭގެ އިގުތިސޯދު ސިންދަފާތުކުރުމާއި ދެމެހެއްޓެނިވި ތަރައްގީއެއް ހާސިލުކުރުމުގައި ދިވެހި ވިޔަފާރިވެރިން އަދާކުރަމުންދާ ދައުރު ފާހަގަކޮށް، ގައުމީ އަދި ބައިނަލްއަގުވާމީ ފެންވަރުގައި ވިޔަފާރިތަކުން ހޯދާ ކާމިޔާބީތައް ފާހަގަކުރުމެވެ. އަދި ގައުމުގެ އުފެއްދުންތެރިކަމާއި ހުނަރުވެރިކަން ކުރިއެރުވުމަށް ހިތްވަރުދީ، ރާއްޖޭގެ ވިޔަފާރިތަކާއި މަސައްކަތްތެރިކަމާއި ހުނަރުވެރިކަން ކުރިއަރުވައި މިސްރާބުކުރުމެވެ.
Ads by STO
