ކޯވިޑް19: ސިއްހީ އެހީތެރިއެއްގެ މޫނަށް ކެއްސި މީހެއް ހައްޔަރުކޮށްފި
ކޯވިޑް 19 ޖެހިފައިވާ މީހުންނަށް ފަރުވާ ދިން ސިއްހީ އެހީތެރިއެއްގެ މޫނަށް ގަސްތުގައި ކެއްސި މީހަކު ހައްޔަރުކޮށްފިއެވެ.
އިނގެރޭސިވިލާތުގެ ގްލޯސްޓާޝަޔަރ ގެ ފުލުހުން ބުނީ ކޯވިޑް 19 އަށް ޝައްކުވާ އަލާމާތްތަކެއް ފެނިގެން 43 އަހަރުގެ ފިރިހެނަކު އައިސޮލޭޝަންގައި ބަހައްޓާފައި ހުއްޓާ އޭނާ ކައިރިއަށް ދިޔަ ސިއްހީ އެހީތެރިއެއްގެ މޫނަށް ގަސްތުގައި ކެއްސުމާއި ގުޅިގެން ްއެމީހާ ހައްޔަރުކޮށްފައިވާ ކަމަށާއި އޭނާ ހައްޔަރުކުރީ، ގަސްތުގައި މީހަކަށް ކޯވިޑް 19 ޖެހިދާނެފަދަ ގޮތަކަށް އަމަލު ކުރުމުގެ ކުށުގައި ކަމަށެވެ.
މީގެ ކުރިން ކޯވިޑް 19 ޖެހިފައިވާ ކަމަށް ބުނެ ސިއްހީ އެހީތެރިއެއްގެ މޫނަށް ކުޅު ޖެހި އުމުރުން 48 އަހަރުގެ ފިރިހެނަކު ވެސް ވަނީ ހައްޔަރުކޮށްފައެވެ. ޕޯލް ލެވިއާ ނަމަކަށް ކިޔާ އެމީހާ ހައްޔަރުކޮށްފައިވަނީ ނޮޓިންހަމްޝަޔަރ އިންނެވެ. ކޯވިޑް 19 އަށް އޭނާ ޓެސްޓް ކުރުމުން އޭނާ ވަނީ ބައްޔަށް ނެގެޓިވް ވެފައެވެ.
އާއްމުންގެ ފަރާތުން ސިއްހީ އެހީތެރިންނަށް އެކި ކަހަލަ ނުރައްކަލާ ދަނީ ކުރިމަތިވަމުންނެވެ. ކޯވިޑް 19 ބަލި ޖެހޭ މީހުންނަށް ފަރުވާ ދިނުމަށް ހަރަކާތްތެރިވާ ނަރުހުންނާއި ޑޮކްޓަރުންގެ ސަލާމަތާއި ރައްކާތެރިކަން ކަށަވަރު ކުރަން ގިނަ ގައުމުތަކުން ވަނީ ހަރުކަށި ފިޔަވަޅުތަކެއް އަޅާފައެވެ.
މިހާތަނަށް ކޯވިޑް 19 ޖެހިގެން މަރުވި މީހުންގެ އަދަދު ވަނީ 6 ލައްކައަށްވުރެ މަތިވެފައެވެ. ބަލިޖެހިގެން މަރުވި މީހުންގެ އަދަދު ވަނީ 28000 އަށްވުރެ މަތިވެފައެވެ.
Ads by STO
