10 އަހަރުގެ އަންހެން ކުއްޖަކަށް ޖިންސީ ގޯނާކުރި 51 އަހަރުގެ ފިރެހެނަކު ހައްޔަރަށް
ކުޑަ އަންހެން ކުއްޖަކަށް ޖިންސީ ގޯނާކުރި މައްސަލައެއްގައި އުމުރުން ދުވަސްވީ މީހަކު ހައްޔަރުކޮށްފި އެވެ.
މި މީހާ ހައްޔަރުކޮށްފައި ސައުތު ސެންޓްރަލް ޕޮލިސް (މ، ފ، ދ، ތ، ލ) ގައި ހިމެނޭ ރަށަކުންނެވެ. މި މައްސަލައިގެ ރިޕޯޓު ފުލުހުންނަށް ކޮށްފައި ވަނީ މި މަހުގެ 25 ވަނަ ދުވަހު އެވެ.
މީޑިއާތަކަށް މިއަދު ފޮނުވި މެސެޖެއްގައި ފުލުހުން ބުނީ މި މީހާ ހައްޔަރުކޮށްފައި ވަނީ އުމުރުން 10 އަހަރުގެ ކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ކަމަށެވެ.
"މި މައްސަލަ އާ ގުޅިގެން 51 އަހަރުގެ ދިވެހި ފިރެހެނަކު އިއްޔެ ވަނީ ހައްޔަރުކޮށްފައި،"
މި މައްސަލަ ފުލުހުންގެ ގެންދަނީ ތަހުގީގު ކުރަމުންނެވެ.
މިދިޔަ ހަފުތާގައި ހުޅުމާލެ މޫދަށް އެރި އުޅުނު ކުޑަ ކުއްޖަކަށް ޖިންސީ ގޯނާ ކުރި ކަމަށް ތުހުމަތު ކުރެވޭ މައްސަލައަކާއި ސައުތު ޕޮލިސް ހިމެނޭ ރަށަކުން އިތުބާރު ކުރެވޭ މަގާމެއްގައި ހުރެ ކުޑަ ދެ ކުއްޖަކަށް ޖިންސީ ގޯނާކުރި މީހެއްގެ މައްސަލަ ވެސް ވެސް ފުލުހުން ދަނީ ބަލަމުންނެވެ.
ނޯޓު: ކުޑަކުދިންނާ ގުޅޭ މައްސަލަތަކަކީ ސީރިއަސް މައްސަލަތަކަކަށް ވާތީ، ކުއްޖާގެ އައިޑެންޓިޓީ ރައްކާތެރިކުރުމުގެ ގޮތުން ފުލުހުންގެ ހިދުމަތުން ކުއްޖާގެ އަތޮޅާއި ރަށް ހާމައެއް ނުކުރެ އެވެ.
